Vrederic van Echten VoLKiERSzone schenkt voor buren van Holt aan de abdij van Dickenynghe en van Rune een pacht van 2 mudden winterrogge en 2 mudden havermolt over Wedekinghe-gued te Holt in Beylre kerspel; opdat hij en zijne vrienden zullen deelen in alle waldaet, die men beghaet in den convente van Dickenynghe ende van Rune vornomt. Met medebezegeling door Johan van Runen en Godeuard van Echten.
c) Ic, Vrederic van Echten Volkiers zone, doe kund ende kenlic alien luden, die desen brief solen sien ofte horen lesen, dat ic voer my selven ende vor mijn rechte erfghenamen mit ghesonden live, mit gueden voerrade ende mit minen vryen willen ghegheven hebbe ende gheve in rechten testamente den abte ende den ghemenen convente van Dickenynghe ende van Rune twe mudde winterrogghen ende twe mudde haverens moltes alle jaer, die ic hem bewiset ende opghelaten hebbe voer den buren van Holt over Wedekinghe gued, dat gheleghen is to Holt in Beylre kerspele. Ende hiermede sal ic ende al mine vriende deylachtich wesen ewelic ende ummermeer alder waldaet, die men beghaet in den convente van Dickenynghe ende van Rune vornomt. Ende dat ic, Vrederic van Echten voers., wille, dat dit vast ende stede sy ende wal gheholden werde van my ende van mynen rechten erfghenamen, so heb ic dessen brief beseghelt (mit) minen seghel, ende om die meenre vestenisse so heb ic ghebeden eersamen luden ende wysen Johanne van Runen ende Godevarde van Echten, dat sie dessen brief mit my beseghelen willen. Ende wy, Johan van Runen ende Godevard van Echten vornoemt, hebben om bede willen Vrederix van Echten voers. dessen brief beseghelt myt onsen seghelen. Ghegheven int jaer ons Heren MCCC vijf ende vijftich des Donredaghes na onser Vrouwendach Annunciacio.
