Gheert de Stevinghe en zijne vrouw Telle pachten van den abt te Dickenijnghen 1/5 van het goed to Steghinghe te Legghelo Met bezegeling door den pastoor te Deueren en den vicaris te Dwinglo.

a) Alle luden, die dessen brief solen sien oft horen lesen, doe wy verstaen, Gheert de Stevinghe, ende Telle, mijn echte wijf, ende enkennet des, dat wy mit vryen willen uns selves ende mit raede onser erfghenamen ontfanghen hebben dat derdendeel van des abts pachtguede to Dickenijnghe, dat gheheten is to Steghinghe ende gheleghen is bijnnen Legghelo, in alsulken manieren dat wy dat voerscreven guet besitten sullen in alsulken rechte als men alsulc pachtguet mit rechte besitten ende ghebruken sal, updat wy den abte ende den convente van Dickenijnghen oer jaerlix pacht ende oer recht van den voerscreven guede jaerlix wal bitalen. Weert oec dat wy dat niet en deden, soe sint vorwarde, dat sie dan oer jaerlix pacht ende oer jaerlix recht penden moghen na Drenteschen lantrechte uyt den voerghenomeden guede ende voert uyt alle unsen guede, waer sie willen, binnen den palen van Drenthe sonder yenigher-hande hinder ende sonder yenigherhande wedersegghen van ons ende van als onsen erfghenamen, al arghelist uytghesproken. In kennisse der waerheyt heb wy ghebeden gueden eersamen luden ende preesteren, heren Gheerde, den kercheren van Deveren, ende hern Henric, vicarius to Dwinglo, dat sie dessen brief beseghelen willen mit oren seghelen voer ons ende over ons, want wy selven ghene seghele en hebben. Ende wy, her Gheert, kercheer to Deveren, ende her Henric, vicarius to Dwinglo, hebben um bede willen desser voerseyder lude unse seghele an dessen openen brief ghehanghen tot enen waren tughe. Ghegheven int jaer ons Heren MCCC seven ende seventich up sente Margretendach.

x

x

Archiv	Drents Archief
Bestand	Arch. Abdij Dikninge
Zugangsnummer	440
Inventarnr.	1
Fol. Nr.	fol. 40v
Regestnr.	105
Jahr	1377
Datumcode	Margar

x

x

Material	perkament

x

Editionen	O0656