Reynolt van den Cloestere en zijne vrouw Margarete vermaken, in overleg met hun zoon Johan, aan de abdij van Dickenijnghen eene rente van 1/2 emmer boter uit hun goed in de Broechusen; welke rente zal worden genoten binnen het jaar na het overlijden van een van hen beiden.
a) Allen luden, die dessen brief sullen sien oft horen lesen, doe wy verstaen, Reynolt van den Cloestere ende Margarete, mijn echte wijf, dat wy mit vryen willen ons selves mijt ghesamender hand, mit raede Johans unses soens ende mit consente onser gheerfnamen , tot enen ewighen testamente um troest onser sielen ende hopenijnghe des ewighen levens ghemaket ende ghegheven hebben, maken ende gheven apenbaer mit dessen openen brieve den abt ende den ghemenen convente van Dickenijnghen een half emmer boteren jaerliker renten over ons allinghe guet in den Broechusen *) in alsulken manieren. Wanneer die ene van ons twen niet langher en is, so sal dat halve emmer boter voers. daerna binnen den yersten jare volghen den abt ende den convente van Dickenijnghe voers. ende solen des ewichlike vry ghebruken sonder yenigherhande hinder ende sonder yenigherhande wedersegghen van onser enich ende van al onsen erfghenamen b), al arghelist uytghesproken. In kennisse der waerheit heb ie, Reynolt van den Cloestere voers., dessen openen brief beseghelt voer my selven, voer Magreten, mijn echte wijf, voer Johanne onsen sone ende voer onse erfghenamen. Ende wy, Magrete ende Johan voers., ghelyen alle desser verwarden onder seghele Reynoldes van den Cloestere voers., want wy selven op desse tijt ghene eyghene seghele en hebben. Ghegheven in den jaer onses Heren dusent driehondert ende achtentich des Saterdaghes na sunte Paulus daghe, gheheten in den latine Conversio Pauli.
