| Nummer:gus0002 | Datum:3. April 1438 | Überlieferung:Original | Fundstelle:Rep. 1 (Große Urkundensammlung), inv.nr. 0002 |
Das Auricherland stellt sich unter den Schutz der Häuptlinge Edzard und Ulrich Cirksena und des Wibet von Esens.
In den namen Godes. Amen. So sy dat witlik unde kundich allen ersamen vromen luden, de dussen breff zeen unde horen lesen, dat wy ghemeyne menheyt unde inwoners in Auwerkelande bekennen unde betugen vor alsweme in dussen open besegelden breve uns leffliken unde vruntliken vorenyghet unde vorbunden hebben unde vor unse aversten unde vormunder ghekoren hebben dusse nabescreven vromen mannes, also by namen Wypte, Edzarde, Ulrike broders, hovetlinge to Ezensen unde Norderlande unde to Gretziil, to ewighen tyden by on to blyvende myt lyve unde myt gude sunder alle arghelyst unde nye vunde unde dat in dusser nabescreven wyse: dat wy meynen inwoners in Auwerkelande ryk unde arme willen unde scholen bystendich unde behulplich wesen bynnen landes und buten landes dussen vorscr. vromen mannes Wypte, Edzarde, Ulrik myt lyve unde myt gude, war on des not unde behoff dot, uppe alle de ghenne, de on myt welde unde unrechte avervallen wel, he zy Vrese offte Dudesche. Ok so sta wy inwoners des landes to Auwerke dem vorscr. hovetlinge al den broke to, de in Auwerkelande vorvalt, he zy luttich offte grot, unde dar scholen se van holden in Auwerke en guden man myt twen knechten, de schalken unde deven sture, unde wen men richten offte reysen schal, de theringe van stan, utgheseget de vere hogesten broke, de scholen se alleyne boren to ere behoff sunder unse wedersprake. Ok so scholen dusse vorscr. hovetlinge unser unde unser inwoners mechticht wesen to eren unde to rechte bynnen landes unde buten landen unde anders nenen overlude to kesende, so lange se leven. Ok so love wy unde sweren in dussen breff, dat wy don willen unde scholen by dussen vorscr. hovetlinge ghelik also de Brockmar unde Norders unde Herlinges don by on, dat gha wo yt gha. Desset verband unde vrunscop to holdende stede unde vast to ewyghen tyden unde nummer to brekende nu unde in tokomende tyden, so hebbe wy unsen landes inghesegel myt vulbort des gansen landes wittliken unde openbar hanghen to dussen breve. Vort so hebbe wy beden de vromen heren her Hinrik, kercheren to Auwerk, heren Alberte, kercheren to Wene, [*] heren Bolen, kercheren to Holtdorpe, dat se wol deden umme unses landes bede wille unde ok meer tuchnisse der warheyt unde hengen ere ingesegel myt des landes segel to dussem breve. Datum anno Domini MoCCCCo XXXVIIIo, feria quinta post dominicam Judica me.
x
| Archiv | NStA |
|---|---|
| Bestand | Rep. 1 (Große Urkundensammlung) |
| Zugangsnummer | R001 |
| Inventarnr. | 0002 |
| Jahr | 1438 |
| Datumcode | JpJudica |