| Nummer:gus0006 | Datum:27. Sept. 1440 | Überlieferung:Original | Fundstelle:Rep. 1 (Große Urkundensammlung), inv.nr. 0006 |
Der Häuptling Cirk von Friedeburg räumt den Häuptlingen Edzard und Ulrich Cirksena die Friedeburg ein.
lk Syrich to der Vredenborch hovetling bekenne unde betuge in dessem openen breve vor alsweme, dat ich my vruntlyken vorenighet, verbunden unde vordreghen hebbe myd den erbaren wysen mannen Edzarde, to Emeden unde Norderlande, unde Olrike dessulven Edzardes broder, to Ezensen unde Auwerke hovetlingen, in desser nabescrevenen wyse: also das de vorbenante Vredenborch, dewyle ich unde mynes broder kyndere unse vrund unde erfnamen der mechtich sind, schol wesen den vorben. Edzarde unde Olrike, eren erfnamen, vrunden unde medehulperen ere opene slot unde vestinge in alle eren nuden unde noden, wan se des von my, mynes broders kyndere effte erfnamen unde vrunden begherende zin, unde my offte se darto esschende werden sunder jenigherleye wedersprekent offte ansaghe. Dat ich en ghelovet unde ghesworen hebbe, love unde swere jeghenwardighen in desser scryfft myd mynen upgherichteden liffliken vyngheren rechtes stavedes eedes to den hilgen, stede, vast unde unvorbroken to holdende in guden truwen sunder alle arghelyst offte jenigherleye behelpinghe jenighes gheystlikes ofte werlikes rechtes. Unde des to meer tuchnisse unde groter withlicheyd, so hebbe ich Syrck vorscr. myn ingheseghel vor my unde vor mynes broder kynder unde unse erfnamen unde vrunde wytliken henghen laten beneden to dussem breve. De ghescreven unde ghegheven ys na der bort Christi dusent veerehundert jare, darna im XL jare, uppe der hilghen merteller dach Cosme et Damiani.
x
| Archiv | NStA |
|---|---|
| Bestand | Rep. 1 (Große Urkundensammlung) |
| Zugangsnummer | R001 |
| Inventarnr. | 0006 |
| Jahr | 1440 |
| Datumcode | CosDam |