| Nummer:gus0011 | Datum:1. Sept. 1443 | Überlieferung:Original | Fundstelle:Rep. 1 (Große Urkundensammlung), inv.nr. 0011 |
Onno Helmesten überträgt dem Häuptling Ulrich Cirksena die Burg in Nesse.
Ik Onno Helmelsten wonaftich to Nesse[*] bekenne unde betuge openbar in desseme jegenwardigen breve vor alle den ghennen, de ene seen ofte horen lesen, dat ik mid vorbedachten modewillen unde vulborde myner rechten erven hebbe upgedregen unde overgeven, updrege unde overgeve jegenwardigen in unde mid krafft desses breves deme eddelen manne Olrike to Norden, Brokmerlande, Emeden, Esensen, Aureke unde Lengen etc. hovedlinghe unde sinen rechten erven de borch to Nesse[*] mid sodanner herlicheid, tobehoringhe unde rechticheid, alse mi unde mynen erven van ervetales wegene darvan tokumpt; so dat de vorben. Olrik unde sine erve desulve borgh to Nesse mogen bruken, krenken unde eren willen darmede don sunder myne unde myner erve weddersprake; und ik unde myne erve ofte nemand van unsser wegene geboren unde ungeboren willen unde scholen uppe de vorscrevene borch nummer klagen ofte spreken, noch mid geistliken noch werlikem gerechte, hemeliken noch openbar in allen tokomenden tiiden; men myne andere erffgudere in deme kerspelle to Nesse unde werde anders sind belegen ik unde myne erve willen unde scholen bruken to unsseme willen. Unde des to ener groteren witlicheid, bekandnisse unde sekerheid hebbe ik Onno vorben. min rechte ingesegel mid willen unde witschop hangen heten to desseme breve, unde wii Olricus to Nesse unde Reynerus to Erle kerkheren bekennen openbare vor allisweme, dat wii umme frundliker bede willen des vorben. Onnen unssen rechten ingesegel dergeliken mid guden willen mede hangen heten to desseme breve. Gegheven na, der bord Christi dusend veerhundert jar, darna in deme dre unde veertigesten jare, in sunte Egidii dage des hilligen abbetes.
x
| Archiv | NStA |
|---|---|
| Bestand | Rep. 1 (Große Urkundensammlung) |
| Zugangsnummer | R001 |
| Inventarnr. | 0011 |
| Jahr | 1443 |
| Datumcode | Egidii |