Vertrag zwischen den Grafen Edzard I. und Uko von Ostfriesland und dem Lande Dithmarschen.
Wy Edtzart und Uko gebruder, gravenn und herenn van Oestfrisslande, und wy vogede, sluter und geswarne vorwesser und dat gemeyne lanth te Dittmerschenn bekennen und betugen apenbar in und mit dusseme brive vor alle denjennen de ohn sihn, huren edder lessenn, dat wy uns mit wolbedachten mode, guden berade, willen und fulborde unsser borger und rede und der gemeynen inseten unses landes Dittmerschenn vorgeschreven, Gade dem Herenn to lave, deme hilligen Romischen rike nicht to vorphange, sunder allewege to werdicheit und to eren, dorch noet, nuet und fromen willen unser beyder lande, borgeren, inwoneren, lanthsaten und deme gemeynen besten to gude, unrechter gewalt wedertostande, uns lofligen, leefligen und fruntligen voreeniget, verstricket, to hope gesatet unde verbunden hebben, to hope setten und verbinden uns ock in craft und macht dusses breves in dusser naschrevener wyse. Int erste dat eyn jewelick von uns synenn rechten heren schal plegen und don wes hie ohm von eren und rechtes wegen schuldich is; vordermeer alse wy von beden parthen baven unsse schult syn georsaket, dat eyn islich von uns insunderheit vor dusseme vorbunde mit den duchtigen Eden, to Jewer hovetlinge, und Hero Ohmken, to Dornum ritter, und orer medehelper vigende worden und noch syn, so willen und scholen wy ergnanten graven und herenn und wy Ditmerschen von unser und ock unser lande wegen eynir sunder den andern mit den gnanten unsen vigenden und oren helperen und anhengeren nicht avesoenen, noch soenen laten, edt ehn sie denn unser beider parthe wille und fulbort. Wy gnanten graven willen by den Ditmerschen unsen verwanthen, frunden, upsetten alle unse macht, lande und lude, so lange die vehede al uth waret, und dat wy mogen mit unser beder wille einen erligen, borligen, guden slete krigen, die uns erlich und nuttlich is up to nehmende; und wy ergnanten graven und heren willen und scholen ock nichtes forder vehede halven don ofte don laten up oren trost und hulpe, wy don dat denne mit der Dittmerschen wille und volbort, so hirna steidt. Desglicken schollen und willen wy Ditmerschen ock nicht myn ofte mehr don, sunder also wy des von beiden parthen synnes syn und werden, ener up des andern trost und hulpe wes to donde und vor tho nemende, so schollen und willen wy ergnanten graven den Dittmerschen unsen frunden soss weken tovorenn schriven und denne virtehn dage[*] daran to hope schicken bynnen Bremen ofte Blixen, war wy an beiden deilen denne sekerst und best mogen to hope wesen, und dar an beiden syden unse fulmechtigen schicken und enttligen darto slutende, wo man die dingk schal anphaen, so verne nicht welcken parte von noden sie uth redelige orsake torugge to sprekende, und na sodaner ruggesprake schal glickewol dat part deme anderen in virtehn dagen to hant daran syne meynange toschriven und dat doreh nynerleie wyse sunder redelige orsake anestellen; wil und kan averst insunderheit wy von uns beiden sunder des andern trost, hulpe, radt und fulbort wes gegen unse vigende don, dat mach diejenne don up synen eigen schaden, ghewinst und aventure, und wy willen ungesumeth by eyn bliven alle die wyle unser eyn des andern in der sake to eren und rechte mechtieh is. Und wan wy des, wo vorsteidt, mit guden ripen rade syn eyns geworden und mit beyder parte wille die vehede samptligen antogande, so willen und scholen wy mehrgnanten Dittmerschen den gedachten graven to stur syner privande und syner soldener senden na oren willen virdusendt Rinsche gulden und to hulpe schicken dusendt guder versochter foethknechte, der vifhundert uthlandesche knechte scholen wesen to krige wol vorsocht, und die andern von den unsen, mit ratschap to sodanen ernste dynende, und die up unse kost, teringe und schaden dar int lanth holden so lange die vehede wart, und wan sodane virdusendt gulden uthkamen und betalet syn umme sodane vehede to holdende, so willen wy umme guder eynicheit willen von beiden parthen die sake to Hamborch anhalinge halve, jettliger guder gearbitriret und hengende, deger und al doet und los laten syn, nymehrmehr darup to sakende. Wy ergnanten Ditmarschen hebben uns ock vorwillet und vorplichtet, weret sake unse vigende sick starckeden und mehr hulpe und byfall kregen, und von noden worde de obgnanten graven und herenn unse frunde sick ock moesten stercken mit volcke, so willen und scholen wy ohn noch to hulpe kamen und ock helpen stercken mit dusendt to toete uth unseme lande mit ratschap wol vorsorget, welcke wy mit den andern, so vorgerueret is, so lange willen ock dar holden in Oestfrisslande up unse kost und schaden, allediewile die vehede waret, und alle den gewinst, rof und nahme, die wy under malckander wynnen und averkamen, schal man na antael der lude den gewinst wynnende, parten und buten, na adelicheit und butesrechts, und alle gefangen resick und to foete, die wy an beiden delen in der selftigen vehede fangen, scholen uns allen beiden glike vorscreven gelden, und alledewyle wie mit unsen gnanten vigenden nicht mogen to enttligen slete kamen, so schal die sake, die wy hebben, von beiden parten gesettet by dat werdige capittel und den erhaftigen radt to Hamborch so lange von beyden parten unverfordert bliven. Weret ock sake, dat wy vor der soene mit ripen rade die vehede samptligen angyngen und die virdusendt gulden betalet weren, so schal dat gan wo vorsteydt. Alle vorschreven artikele und eyn jewelick by sick laven wy ergnanten graven und heren, und wy vogede, sluter, vorweser und gemeyne lanth to Ditmerschen vor uns und unse nakomelinge unser eyn deme anderen stede, vaste und unverbraken wol to holdende sunder argelist und geverde in groteren gloven und guden trewen. Und des to orkunde und groterer tuchnisse hebben wy unse vorschreven beyder parthe ingesegele mit weten und willen an dessen breve, der twe synth aleynes luden, die eine by uns graven und die andere by uns Ditmarschen vorgeroret in underverwaringhe liggende, laten hengen. Geven und schreven na Cristi gebort virtehnhundert im vir und negentich, am dage Bartholomei apostoli.
