Die Häuptlinge Hicko und Hero Maurits von Dornum entscheiden einen Streit zwischen dem Kloster Langen und dem Häuptling Victor Frese in Loquard um Grundbesitz im Woltzeter Hammrich.
Wy Hicko unde Hero Mauricii, gebrodere, van Dornum unde Witmunde hoefftlinck, pravest to Emeden, doctoir etc., erkenne unde belyen openbare in dessen unsen openen besegelden breve vor alsweme, dat wy alse vulmechtige schedesfrunde tusken deme werdigen heren Johann van Bummel, pravest to Langen, van der ene, unde deme erbaren unde duchtighen Victor Fresen, to Loquart hovetling, syner huesfrouwen wegen, anderdeels, eyn faste ewighe fruntschapp hebben gemaket unde gededinget myt beder parten willen in maneer hyr naebescreven: als dan de vorbenompte Victor Frese van wegen syner huesfrouwe, vruwen Tetten, vulmechtich aneclage dede up dat landt liggende in Woltzeter hammerick, dat welke juncker Eggerd unde juncker Keen, gebrodere, hovetlinge to Risum unde Loquart, hadden den vorbenompten provest, her Johann. van Bummel, unde closter van Langen vorkoefft, meynende he dar neger koepp to sin syner huesfrouwen wegen etc., dair dan desulve provest van Langen synes closters wegen weder up antworde unde meynende, de rechticheit des wederkoeps unde negerkoeps wer al vorjaret, he haddet dat landt gekofft unde wal betalet myt breve unde segell dair an vorwisset, unde ock darby rorde, dat sulve land in Woltzettel hammerike van ene gekofft, wer in vortyden komen van sinen orden, nomptlick uet[*] deme closter Barte, vorhopede darumme de koep wal myt rechte van gode staen mochte, dair Victor vorbenompt doch nicht wolde mede tovreden sin; als wy daen allenthalven de gebreke tusken beiden syden hebben gehort, hebben wy als vulmechtige vorblyvensheren tanken beyden syden en fruntlike uetsproke gedacn, dat eyn ider part wal belevet, als hir naebescreven is: Int erste, woewal de provest van Langen vormeynt goed recht vor ene sy, hebben wy doech fruntliken uetgesproken unde erkant, dat de pravest van Langen vorgerort sall geven Victor Fresen unde siner huesfrouwen Tetten 7 grese landes, liggende in Comper hammerike by den olden wege, unde sind geheten Foka Haetezna seven grase, vor alle ansprake, de Victor offt sin huesfrouwe mochten hebben an dat vorbenompt land, id sy dan blodes halven offt negerkoepp wegen, woe men de ansprake mochte nemen, des Victor also in unser kegenwordicheit wal tovreden was, unde soedaen 7 grase an sick nam, unde scholt den sulven provest van Langen, heren Johann van Bummel, synen covent unde naekomelinge dat sulve landt to Woltzettell gelegen to gode vor sick, sinen huesfrouwen unde erven to ewigen tyden, so dat de provest van Langen vorgescreven unde sine naekomelinge dat sulve landt mogen vri unde velich hebben unde besitten unde bruken ane jenige besparunge unde hinder to ewigen tyden. Hir by, an unde over weren de ersame unde walwyse meister Herman, kerchere to Emeden, unde Udo von der Kaldenborch, droste to Emeden, darby geeschet unde gebeden. Desses alle to merer gedechtenisse unde festenisse der warheit hebben wy meister Hicko unde Hero Mauricius, gebrodere, van Dornum unde Witmunde hovetlinge, pravest to Emeden, doctoir etc., unse ingesegell witliken heten hangen an dessen breeff. Int jare unses Heren do men screeff dusend veerhundert achte unde negentich, up sunte Anthonys avent.
