| Nummer:gus0821 | Datum:31. Juli 1442 | Überlieferung:Original | Fundstelle:Rep. 1 (Große Urkundensammlung), inv.nr. 0821 |
Der Häuptling Ulrich Cirksena von Norden beurkundet eine Schenkung des Palstra Hesse und seiner Ehefrau Folke an die Kommende Muhde.
Ick Ulrick to Norden, Brockmerlande, Esense, Emeden, Awerke unde Lengen etc. hoeftling bekenne unde betuge clarliken in der warheit vor allesweme mid craft dusses breves, dat ick mid rechte hebbe ghevunden, vulbordet, confirmeert unde vordgheset, vulborde, confirmere unde vordsette yegenwordich, dat her Hero commeldur tor Muden unde sine broders myd vreden unde ghemake scholen bruken to ewigen tiiden in des vorben. closters beste al dat gued unde erve, id se replick edder unreplick, wes Palstra Hesse unde Folque ziin husvrouwe selger decktnisse myd gueden willen, sundes lyves, darin hebben ghegeven um erer selen salicheit, unde schal sunder wedderropen stedes darynne bliven; weer yemende van den vrundes, de na desser tiit dyt vorscr. gued wolde antasten edder claghe maken vor gherichte, de schal kegen my ofte myne nakomelinge vorbroken hebben hundert Rinsche gulden. Des to tuge so hebben hiir an unde over ghewesen her Folkmar, kerkhere to Elsum, [*] Sibrand hoeftling darsulves, Imelo Haringa, voget to Emeden, unde anders vele gueder lude. In orkunde der warheit sunder alle argelist so hebbe ick Ulrick vorscr. myn ingesegel unde wy her Eduard commeldur to Jemgum, her Aelrick provest to Hartzum unde her Coerd kerkhere to Jemgum vorscr. unse ingesegel umme vruntliker bede wille hangen heten to dessen breve. Na der bord Christi MoCCCCo, dar na in deme twe unde veertigesten yare, des avendes ad vincula Petri.
x
| Archiv | NStA |
|---|---|
| Bestand | Rep. 1 (Große Urkundensammlung) |
| Zugangsnummer | R001 |
| Inventarnr. | 0821 |
| Jahr | 1442 |
| Datumcode | vVinPet |