| Nummer:gus0822 | Datum:10. Okt. 1465 | Überlieferung:Original | Fundstelle:Rep. 1 (Große Urkundensammlung), inv.nr. 0822 |
Die Häuptlinge Hayko und Haro von Oldersum beurkunden das Ende ihres Streites mit der Kommende Muhde wegen Grundstücken in Gandersum.
Wy Hayko unde Haro, broders, hovetlinghe tho Oldersum, bekennen unde tughen openbaer in dessen breve, wo dat wy zodane twydracht, als wy hebben ghehad unde hadden myt deme ersamen cummelduren, heren Aynde tor Mude, van testamente unde instrumente weghen zalighen Kenekens unde ziner moder Ghelen, so hebbe wy des eendrachtliken ghebleven by den ersamen mannen, heren Johanne Vredewold proveste tho Emeden etc., Snellegher tho Uphusen hovetling, Itzen Kensna, drosten mynes gnadighen heren heren Ulrikes, unde Benen doemdeler; so hebben ze eendrachtliken uthghesproken, dat de ersame cummeldure vorscr. zal hebben ene fennen van teyn grasen, gheleghen up deme mare, unde ys streckende up Gandersum[*] westerwech, unde den uterdiick van den hoefken went tho deme mare tusken Patkum unde Gandersum gheleghen. In orkonde der waerheyt hebbe wy Hayko und Haro an dessen breff unser beyder seghele ghehanghen, unde to merer vestnisse unde tuchnisse hebbe wy Hayko unde Haro vorben. ghebeden den ersamen mester Johanne Vredewold, provest tho Emeden, dessen breff myt uns tho beseghelen, unde ik Johannes vorscr. umme bede wyllen der ersamen Hayken unde Haren vorben. hebbe myn seghel laten hanghen. Int jaer unses Heren dusent veerhundert viif unde tzestich, des claghes Gereonis unde Victoris.
x
| Archiv | NStA |
|---|---|
| Bestand | Rep. 1 (Große Urkundensammlung) |
| Zugangsnummer | R001 |
| Inventarnr. | 0822 |
| Jahr | 1465 |
| Datumcode | GerVic |