Wij Wilhelmus Frederici pastoer der kercke to
St Meerten in Gronningen, Peter Sickinge
Borgemester in Gronningen, Johan Rengers
ende Dutmaer Rengers hoevelingen ten Poste etc.
bekennen ende betugen mit desen openen breve
dat wy als vulmachtige dedingesluden in
die schelinge tusschen den abt den weerdigen
heer ende conventsluden to Wittewerum
op den ene sijde Ende den eigenarfden
ende buren van Slochteren op d'ander syde
om enen wech ofte brukinge des wechs
van Slochterschiltdamme suidwaerts opstrec-
kende an de buren maden dat stede ende vast
van beiden parten voerscr. an ons belevet
is gewest. Hebben wy se daerom verlijket
ende een utsprake bij hoeren weten ende consent
in nabeschreven manieren daeraf gedaen
also dat de Abt ende convente voerscr, ende hoere
nakomelingen sullen maken ende staende holden
tot ewigen dagen, nu voortan gaende na desen
dage enen dartich Slochter roeden lanck
na behoer des carspels inden voege suidwert
op van den tille Slochterschiltdamme geheten
Beholdens dat de van Werum mit den tille
onbelastet soelen wesen mit alsulke vorwerden
Weert sake dat de van Wittewerum in enigen
tijden enen anderen wech makeden, ende vorwerden
op anderen steden, ende desen wech niet brukeden
sullen se alsdan ongeholden wesen de voerscr. 31
roeden in den voerscr. wech to maken, Ende
wat eerde men daertoe behoevet, moegen de
conventsluden halen waer se best koenen
bekomen an beiden sijden vanden wech voerscr. ende
met vander lant landen ende ock mede daer de
gemene buren voerscr. ende hoere nakomelingen
de eerde halen hoeren wech mede to maken
moegen de conventsluden hoeren eerden halen
ende onbestraflicken hoeren wech mede maken
Waert ock sake dat de voerscr. conventsluden
den wech vergeten ofte versumeden to maken
of dat se gebrecklicken daerin gevonden worden
moegen alsdan de voerscr. buren ofte hoere nako-
melingen de n conventsluden voerscr. voer den
wechrechters in der tijt na gewoente daertoe
dagen ende keden laten bij sodane pene als de
Rechters dat nutte duncket to wesen den voerscr.
wech to maken Ende daerop sullen de van Witte
werum ten ewigen dagen den sulven wech
ten suijden vanden voerscr. tille hen an de buer
schap toe tot hoeren nootdruft mit wagen
peerden ende ossen frij moegen bruken, holt
torf end anders to halen ende to mennen sonder
emants indracht ofte wederseggen, ende of
de buren in enigen tijden daer ock brecklick
an gevonden worden, so moegen de Convents
luden den voerscr. buren ock voer den wechrechteren
daertoe dagen ende keden laten by sodanen pene
als de Rechters daerop setten werden, den voerscr.
wech to maken de hem toekomt to maken
suidwert opstreckende van des Convents wege
voerscr. totten gemenen wege toe, ende dat
nemant van den voerscr. heimlick oft openbaer
sal den van Wittewerum in den noorder wech
van den voerscr. tille noordtwaert opgaende
indracht maken mit woorden ofte mit warcken
heimlick ofte openbaer, worde oeck den voerscr.
wech van emant besperet mit rechte dat den Abt
ende Conventsluden voerscr. den wech in thoko-
menden tijden niet bruken en muchten tot hoeren
profijt, sal dan dese voerscr. handelinge van
gener weerden wesen. Mit welcker utsprake
beide voerscr. parten des so to freden ende
een goet benoegen hebben gehadt. Sonder
argelist. dat oorkonden wij Wilhelmus Frederici
pastoer der kercke tot St Marten, Peter Sickinge
borgemester in Gronningen, Johan Rengers ende
Dutmaer Rengers hoevelingen ten Poste, mit
onse segulen beneden an desen brief gehangen
omme bede willen der voerscr. parten Inden jare
onses heren 1511 des donderdages voer
asscensionis domini.

x

x

Archiv	Groninger Archieven
Bestand	H.A. Farmsum
Zugangsnummer	619
Inventarnr.	0094
Fol. Nr.	fol. 52r
Regestnr.	250
Jahr	1511
Datumcode	JaAscDom

x

x

Material	papier