De rechters en gemene meente van het Aduarderzijlvest enerzijds, en abt Poncien en het klooster Selwerd en de gemene buren van Paddepoel anderzijds, sluiten een overeenkomst over het leggen van een grondzijl in het Reitdiep.

Vy Rechtere ende mene meente vanden dren deelen der zylvesten van Adewerderzyl Alze dat Convent van Adewert die van Middaech en van Lyuwerderwolde ander ene
sijt ende wij Poncien Abt ende ghemene conventislude van Zelwert ende ghemene bure vanden Paddenpoel ande ander sijt doen kundich alle luden ende bekenne mit dessen
openen breve dat wij mit malkanderen van beyde siden overdraghen sijn sodane punten ende vorwarde als hijr nae volghen ghescr. inden yersten hebben wij Rechtere ende meente vanden dren
deelen der zylvesten voirsc. ghegunt ende toestaen ghunnen ende staen toe den Convente van Zelwert ende den ghemenen buren vanden Paddenpoel voirsc. Eenen gruntijl doir dat
westerdiep te leggen die wesen sal vierkant Dre voeten wijt daer doir mede wt te wateren toe Adewerderzijl tot ewighen daghen Ende den selven gruntzijl solen dat Convent
ende die buren vanden Paddepoel leggen op ene leghelike stede by manden raede ende den gruntzijl dichte ende vast maken ende holden dat ons dren deelen vander vorsc. zijlvesten
gheen vremd water toe en kome vandes voirsc. gruntzijls weghen Ende wij drie deel vander voirsc. zijlvesten solen alle jaer drie daer toe seten die ore dyken helpen schouwen
die solen boren die helfte vanden broke die daer op ghesat is Ende die ander helft vanden broke solen hebben die Rechteren vanden Paddepoel Ende die voirsc. dyke helpen schouwen
den dren ghenoeght die wij vander sijlvesten daer jaerlix toe setten des en solen em die anderen Rechtere niet weygheren desse voirsc. dyke solen wesen twe voeten hoech boven
den uterdijck ende solen boven wesen een halve roede breet Ende wanneer desse rechtere omme gaen desse dyke te schouwen weert dat dan yenighe dyke ghebreckelick worden ghe
vonden groot ofte kleyn die sal breken enen olden schilt dertich olde vlemsche grote voirden den schilt gherekent den die dijck toe hoirt ter stond te betalen ende of he nyet en betaelde
se solen die Rechteren den broke ter stond moghen penden wt zinen guede waer zie dat vynden sonder zinen wederseggen voirtmeer solen die vande Convente van Zelwert ende die buren vanden
Paddenpoel den voirsc. gruntzyl holden tot ewighen daghen buten kost ende schade der voirsc. dre deel vander zijlvesten ende solen graven die watringe vanden gruntzijl hen toe Brundeke
maer ok buten kost ende schaden der voirsc. dre deel vander zijlvesten ende jaerlix eens schone maken bynne Achte daghen nae meydaghe went inde maer voirsc. by eenre
pene van twe olde schilde die zie solen breken weert dat zie die watringe dan nyet schoon en makeden als voirsc. is Voirtmeer so salmen setten enen nyen zijl van vierteyn voeten loper
die sal staen by Adewerderzijl Ende sowat die zijl sal kosten ende van alle den arbeyt die daer op valt daer sal dat Convent van Zelwert ende die ghemene buren vanden Paddenpoel van
op staen ende betalen dat vierdepart alwent ter tijt dat die voirsc. nyezijl lopachtich is Daer nae solen dat convent ende de buren vanden Paddenpoel setten enen zijlrechter ghelijck
als die dre parten vander zijlvesten doen Ende solen die voirsc. Twe zijle nye ende olt ende die dyke die daer toe horen mede staendeholden tot ewighen daghen ghelijck den anderen
zijlrechters vander zijlvesten voirsc. Ende dat men enen zijlrechter aldus setten sal als na voirsc. is daer heft voir ghelovet die Abbtende dat Convent van Zelwert voirsc. Ende of daer
ghebreck yn velle alze inden zijlrechter voirsc. dat solden die dre deel der voirsc. zijlvesten moghen penden wt des Conventis guede van Zelwert sonder wederzeggen des
Abbtes ende Conventis voirsc. Voirt hebben Bruyn Klinge Henrick Kater These Huginge ende Sybrant van Loqwert ende die ghemene buren van Paddepoel den Abbte van Zelwert
voirsc. ghelovet em ende zijn Convent voirsc. schadelos te holden in dessen koste elk buer voir zijn andeel Item so en solen die buren vanden Paddenpoel ende die zijlvesten van
Adewerderzijl voirsc. den Abbte ende Convente van Adewert gheen hynder doen inder vischerye noch hynderlick em daer ynne wesen Voirtmeer is hijrtoe ghesproken
wat vorrendel kompt vanden Drenthe ofte van anderen luden die toe dessen zijlen mede wt mochten wateren in toekomende tyden dat sal mede toe bate komen den Conventen
van Zelwert ende den buren vanden Paddenpoel voirsc. ghelijck den anderen zijlrechteren vander zijlvesten voirsc. In orkonde ende dkennisse der waerheyt van dessen punten
voirsc. hebben wy Rodolph Abbt van Adewert ende wy Poncien Abbt van Zelwert onser Convente zeghele ende wy van Myddaech voirsc. onses Amptis zeghel an dessen
brief ghehangen Ende wy Borgermeystere ende Raed der Stad van Groningen omme bede wille der drier parten vander zijlvesten ende der buren vanden Paddenpoel voirsc.
hebben onser Stad zeghel mede an dessen brief ghehangen Ghegeven inden jaer onss heren dusentvierhondertvijfendedertich in sunte Gregoriis daghe.

x

x

Archiv	Groninger Archieven
Bestand	Kloosterarch.
Zugangsnummer	172
Inventarnr.	24
Regestnr.	159
Olim	Arch. Klooster Selwerd, inv.nr. 7, reg. 36. Reg. Feith 1434.19.
Jahr	1434
Datumcode	Gregor

x

x

Kommentar	Met de zegels van het klooster Aduard, klooster Selwerd en het ambt Middag; het zegel van de stad Groningen is verloren

x

Material	perkament