Swederus Uter Loe, proost, alsmede de deken en het kapittel van St. Pieter te Utrecht verklaren, dat zij tegen een vaste jaarlijkse som aan Femia van Deutinchuus in erfpacht hebben gegeven de tienden over haar erf, gelegen te Loon.

Universis Christi fidelibus presentia visuris seu audituris nos, Swederus Uter Loe, prepositus, Robertus de Dronghelen, decanus totumque
capitulum ecclesie sancti Petri Trajectensis facimus manifestum et presentibus protestamur in presentiarum constitutis et quos in futurum series
generationis dederit, quod nos communicato concilio plena deliberatione prehabita concorditer propter urgentem necessitatem nobis et ecclesie
nostre predicte imminentem et aliis a jure concessis et rationabilibus ex causis decimas nostras grossas et minutas et fructus earundem domus,
dicte van Deutinchuus, et prediorum et agrorum ipsius et ad dictam domum Deutinchuus pertinentium, in parrochia et infra limites et terminos
parrochie ecclesie de Rotlo in villa dicta Loen partium Drenthie Trajectensis diocesis site et sitorum et existentium, ad nos, preposituram et
ecclesiam nostram, videlicet pro una medietate ad preposituram et pro alia media parte ad capitulum dicte nostre ecclesie beati Petri spectantes
et pertinentes, que decime predicte olim ab eadem ecclesia nostra fuerunt alienate et distracte et per nos pluribus laboribus et expensis
recuperate, discrete domicelle Femie de Deutinchuus et suis veris et legitimis heredibus successive post ipsam de herede in heredem concessimus
et concedimus per presentes a nobis et ecclesia nostra predicta perpetuis temporibus tenendas et possidendas pro annuo pacto, videlicet singulis
annis pro duobus grossis et dimidio Turonensibus antiquis bonis et legalibus antique monete regis Francie; quos quidem duos et dimidium grosses
Turonenses antiquos dicte monete dicta domicella Femia et heredes ipsius post eam successive possessores dictorum domus, prediorum et agrorum ac
decimarum in parrochiali ecclesia de Anlo partium Drenthie singulis annis in festo et die beati Petri ad Cathedram nobis, videlicet preposito
pro tempore pro media parte et capitulo dicte nostre ecclesie pro alia medietate vel illi, quem ad hoc deputaverimus, seu presbitero in dicta
ecclesia celebranti ad opus nostrum, solvere et deliberare debebit et tenebitur, debebunt et tenebuntur ipsius Femie et post eam heredum ipsius
laboribus, periculis et expensis sine aliqua defalcatione sive deminutione sub conditione, modo et conventione hujusmodi et eisdem adjectis et
appositis. Videlicet quodsi dicta domicella Femia seu heres ipsius successive pro tempore dictam pecunie summam sive pactum, videlicet duos et
dimidium grosses Turonenses antiques dicte monete, singulis annis termino prenotato aliquo tempore solvere et deliberare neglexerit et dictum
pactum, ut premittitur, plenarie dicto termino non solverint de anno in annum, pro quolibet termino neglecto duplam pecunie summam seu hujusmodi
pactum duplicatum solvet et heredes ipsius pro tempore solvent et solvere tenebuntur usque ad quartum annum. Et si adhuc in ipso quarto anno
termino antedicto premissa non servaverit vel non servaverint seu servare neglexerint et ipsum pactum etiam sic duplicatum plenarie non solverit
et heredes ipsius non solverint, cadet et cadent ipso facto ab omni jure, quod ei et eis in hujusmodi decimis et fructibus earundem competiit
seu competere potuit quoquomodo et quod ex hujusmodi contractu eis ipsis decimis fuerat acquisitum, et dicte decime sive prediales sive
personales, majores et minute ad nos et dictam nostram ecclesiam, ut est dictum, et ad liberam dispositionem nostrorum devolventur et nobis et
prepositure et capitulo ecclesie nostre predicte applicabuntur et eas libere retinebimus; et nos de hujusmodi decimis predictis et fructibus
earundem libere absque aliqua interpellatione et contradictione quacunque disponere et ordinare poterimus, prout nobis visum fuerit expedire, et
contractus et omnes condiciones predicti essent quiti et annullati atque nullius momenti censendi, dolo et fraude exclusis penitus in premissis.
Renunciavit insuper dicta domicella Femia pro se suisque heredibus successive pro tempore expresse exceptioni doli mali et in factum ac omnibus
aliis exceptionibus et defensionibus juris canonici et civilis, per quas posset seu heredes sui possent se contra premissa defendere vel tueri
aut etiam venire quoquomodo ac etiam legis dicentis generalem renunciationem non valere. In cujus rei testimonium nos, Swederus prepositus,
nostrum et decanus et capitulum ecclesie sancti Petri predicte capituli nostri sigilla presentibus duximus apponenda. Datum anno Domini
millesimo CCCLX quartadecima die mensis Octobris.

x

x

Bestand	Oorkondenboek Groningen en Drenthe
Nr	492
Olim	Naar het notariële afschrift in no. 500 (ogd0500).
Jahr	1360
Datumcode	1410

x

x

Material	papier

x

Editionen	P.J. Blok e.a., Oorkondenboek van Groningen en Drente, I (Groningen 1896), nr. 492.