| Nummer:ogd0846 | Datum:15 dec. 1392 | Überlieferung:Editie | Fundstelle:Oorkondenboek Groningen en Drenthe, nr. 846 |
Deken en kapittel van de Dom te Utrecht verpachten hun rechten en goederen binnen en buiten Groningen alsmede in Wold en Gho aan burgemeesters raad en gemeente van Groningen.
Alle denghenen, die desen brief sellen sien of horen lesen, wy deken ende capittel ten Doem tUtrecht maken kond ende kenlic, dat wi in pachte ghegheven hebben ende gheven mit desen brieve den borghermeysteren, raet ende der ghemeenre stad van Gronynghen al onse gherichten ende heerlicheiden tot Groninghen, hoghe ende leghe, bynnen ende buten Gronynghen gheleghen, mit Wolde ende mit Ghoe, mit hofsteden, mit tymmer, mit ackeren bouwich ende onbouwich, campe, weyde, visscherye, weghe, waterganc, mit munte ende mit tolle cleyn ende groot, ende mit allen horen toebehoren alst ons, onser kerken ende onsen capittel aenghecomen ende ghegheven is van keyser Heinric ende alst die van Zelwaerden van ons, onser kerken ende capittel in voertiden in pacht ghehadt hebben, ende also groot ende also cleyn alst ons onser kerken ende onsen capittel voerscreven toebehoert ende niet meer, uutghenomen tyns, tienden, renten ende ander erfnisse, als wi daer ligghende hebben, welc in desen voers. pacht niet begrepen en siin, tot hondert jaren toe naestcomende der daten des briefs, elx jaers om drie ende tachtich ende enen halven goede, oude, guldene Vrancrijcsche scilde, die voer der daten des briefs ghemunt siin, of also voel voer elken Vrancrijcschen scilt aen anderen paymente, daer men op elke tijt der betalinghe enen Vrancrijcschen scilt binnen Utrecht om copen mach, die ons die stad van Groninghen voers. op horen cost, anxt ende arbeyt betalen sellen jaerlix binnen onser kerken van Utrecht, sonder enich ofcortinghe of verminringhe ons voers. pachts om enich commers of lettenisse wil, die hem aen den voerseiden gherichten ende heerlicheiden ghescien mochten, het waer mit heren craft, heercraft, mit weerliken rechte of om anders enighe zaken, tot sinte Petersmisse ad Vincula of bynnen twe maenden daerna onbegrepen. Ende waer dat zake dat si des niet en deden, so vielen si alle maende in eenre penen van vier ouden scilden, drie maende lanc duerende na den termijn voerscreven. Ende waer dat zake dat si binnen den voers. drien maenden den voerscreven pacht mit den voerseiden penen, die dan verboert waren, niet vol ende al en betaelden, so vielen si van allen rechte ende toesegghen, dat si hadden of hebben mochten aen den gherichten ende heerlicheyt mit Wolde, mit Ghoe, mit hofsteden ende mit allen horen toebehoren voerscreven, ende dieselve heerlicheit ende gherichten mit Wolde, mit Ghoe, mit hofsteden ende mit allen horen toebehoren voerscreven quamen dan weder vry ende los aen ons ende onser kerken ende onsen capittel voerscreven onsen vryen willle daermede te doen sonder yemants wedersegghen, alsoverre als wijt aennemen wouden ende anders niet, behoudelic ons nochtans ons verzetens pachts ende verboerden penen. Voert sel die stad van Groninghen dese voerscreven gherichten ende heerlicheiden mit Wolde, mit Ghoe, mit hofsteden ende mit allen horen toebehoren voerscreven op horen cost, anxt ende arbeyt verantwoerden in allen weerliken rechte, daer men se aenspreect, ende wi sellen die stad voers. machtich maken mit onsen openen brieven dese voerscreven gherichten ende heerlicheiden mit Wolde, mit Ghoe, mit hofsteden ende mit allen horen toebehoren voerscreven te verandwoerden in allen weerliken gherichte. Voert sel die stad van Groninghen tot allen twintich jaren op sinte Petersdach ad Vincula of binnen tween maenden daerna onbegrepen mit horen zekeren bode onse voers. gherichten ende heerlicheiden mit horen toebehoren voerscreven voer ons binnen onser kerken van den Doem voerscreven verzoeken mit seven marck lodewijchs zilvers, ende wi sellen hem op dat versoec onse brieve gheven, ist dat zij t begheren buten horen cost. Voert selle wi dese voerscreven gherichten ende heerlicheiden mit Wolde, mit Ghoe, mit hofsteden ende mit allen horen toebehoren voerscreven op onsen cost verandwoerden teghen alle denghenen, die se aenspreken mit gheestliken rechte; ende worden si ons in gheestliken rechte so volcomelic ende claerlic ofghewonnen, dat wi ons mit rechte niet meer en weerden of weren en mochten, of dat wi deser voerseider gherichten ende heerlicheiden mit Wolde, mit Ghoe, mit hofsteden ende mit allen horen toebehoren voerscreven mit onser versumenisse quijt worden, so waer voertmeer al dese pachtinghe ende huerweer quijt ende doot. Voert ist vorwaerde, dat die stad voers. hoer pachtrecht ende huerweer der gherichten ende heerlicheiden mit Wolde, mit Ghoe, mit hofsteden ende mit allen horen toebehoren voerscreven versetten noch verzellen noch vercopen noch in gheenrehande manieren aen yemant anders brenghen en sellen buten onsen consent ende wille. Ende deden si dat, of dat si enich van den voers. punten verbraken, so vielen si claerlic van allen rechte ende toesegghen, dat sie hadden aen den gherichten ende heerlicheiden mit Wolde, mit Ghoe, mit hofsteden ende mit allen horen toebehoren voerscreven, alsoverre als wijt aennemen wouden ende anders niet, behoudelic dies dat si in desen voers. gherichten tijtlic ambochtslude setten moghen van horen weghen. Voert ist vorwaerde, dat Godevaert ende Johan ten Hove ende Zwanelt, hoer moeder, behouden sellen alsulke huerwere ende pacht als si tot hoerre dryer live van ons bebrieft hebben aen dat derdendeel van den gherichte voerscreven, om twe marcken goets fyns lodewijchs zilvers tsjaers, die sie daerof jaerlix der stad van Groninghen voers. betalen sellen. Ende die stad van Groninghen sel onsen personen ende boden, als si binnen hoerre stad comen, gunstelic ende vorderlic wesen in allen zaken, die si daer te doen hebben. Ende desghelikes selle wi der stad personen ende boden van Groninghen weder doen, als si aen ons ende aen onsen capittel te doen hebben. Ende quame wi of enich persoen van onser kerken of onse boden binnen der stad van Groninghen, die sel daer veylicheit in hebben ende daerin besceermt wesen ghelijc horen borgheren, ende wi, onse persoen ende boden voerscreven sellen mit onsen goede in der stad van Groninghen ende in den gherichten ende heerlicheyt voerscreven veylich varen, dueren ende comen sonder tolle, wechghelt of tsijs of ander onghelt te ghelden. Voert als dese voerscreven hondert jaer omghecomen siin, so is dese pacht ende huerweer quijt ende doot. Mer ist dat die stad voerscreven dese gherichten ende heerlicheyt mit Wolde, mit Ghoe, mit hofsteden ende mit allen horen toebehoren voerscreven dan voert in pacht hebben willen, so sellen si binnen twe maenden na sinte Petersdach voerghenoemt horen bode senden voer onse capittel ende verzoeken die gherichten ende heerlicheyt mit Wolde, mit Ghoe, mit hofsteden ende mit allen horen toebehoren voerscreven mit vijftich marcken goets fiins lodewijchs zilvers, ende dan selle wi of onse nacomelinghe den borghermeysteren, raet ende der ghemeenre stad van Groninghen dese gherichten ende heerlicheiden mit Wolde, mit Ghoe, mit hofsteden ende mit allen horen toebehoren voerscreven weder verlyen ende bekennen hondert jaer in derselver manieren alse voerscreven is, alsoverre als ons dan van allen verleden pacht ende verboerden penen voldaen waer, ende also voert ewelic van hondert jaer tot hondert jaeren, ende nye brieve ofgheven ende nemen, sprekende van woerde te woerde, als dese brief spreect, ende dierre brief niet te weygheren. In oerconde des brief beseghelt mit ons capittels seghel. Ghegheven int jaer ons Heren dusent driehondert twe ende tnegentich des Sonnendaghes na sinte Luciendach.
