Abt en convent Gerkesklooster verklaren een verdrag te hebben aangegaan met de stad Groningen.

Wy , abt ende oldermans ende mene conventeslude van Gherkescloester , bekennen ende betughen met dezen
openen breve , dat wy ziin overdraghen met den borghermesteren ende rade ende met der menen stad
van Groninghen in dezer manyer: Hevet jenich man van den van Groninghen to claghen up jeneghen conventesman of up jeneghen man van onsen
ondersaten, den sulle wy rechtes helpen over dwersnacht sunder verweygheringe. Ende weert sake dat wy des nyet en deden ende de borghermesters
dat an ons vervolghet hebben met enen breve, daerna so moghen zie onses conventes gued daervor besetten bynnen Groninghen sunder onsen toren
ende ovelen moet. Voerdmer velle anders jeneghe schelinghe tuschen de van Groninghen ende ons, des sulle wy elkes jaers eens tosamen komen of
dicker in de stad des Maendaghes na Paeschachtende, ende sullen dat by ons selven scheden to mynne of to rechte. Ende wy sullen de koeplude
vorderen ende velighen, daer wy konnen ende moghen na onser macht. Ende dese vors. ponten love wy der stad van Groninghen stede ende vast to
holden, al wanter tiid dat zie ons of wy hem dat een jaer to voren upsegghen. Al arghelist uetghesproken. In orkunde so hebbe wy onses conventes
seghel van Gherkescloester vors. an dezen breef ghehanghen. Ghegheven int jaer onses Heren dusent drehondert dre ende neghentich up onser
Vrouwendach Nativitas.

x

x

Bestand	Oorkondenboek Groningen en Drenthe
Nr	855
Olim	Naar het origineel in het rijksarchief te Groningen (Reg. 1393, no. 5), hoog 12, breed 25,5 cm. Ook gedrukt bij Driessen, blz. 469.
Jahr	1393
Datumcode	NatMar

x

x

x

Kommentar	Aan het stuk hangt een brokstuk van het zegel van Gerkesklooster in groene was, vertonende onder een baldakijn Maria in zittende houding met het kind Jezus op den linkerschoot.

x

Material	papier

x

Editionen	P.J. Blok e.a., Oorkondenboek van Groningen en Drente, II (Groningen 1899), nr. 855.