| Nummer:ogd1182 | Datum:13 juli 1404 | Überlieferung:Editie | Fundstelle:Oorkondenboek Groningen en Drenthe, nr. 1182 |
Keno ten Broke en een aantal Oostfriese hoofdelingen verklaren een verbond te hebben gesloten met Folkmar Allena, Aeyld en Haycke van Faldern, o. a. tegen Groningen.
Wy, Kene van den Broke, hovetlingh, Enne to Hlerelte, Sybrand van Loquarde unde de Benyngmans, alzo Ymelo Ydzardis, Hare in der Greeth, Enne to Norden, Enne to Pilsum, Dedeke to Pewesum unde Wygerd to Vysquarden, bekennet unde betughet openbare in dessen breve vor all denghennen, de ene zeet offte lezen hored, dat wy uns vruntliken vorenyghed unde to ewyghen tyden vruntliken uns overeen vordreghen hebbet myt Folkmar Allena, Ayelde synes broder zone unde mit Haycken van Falren, wy mit en unde ze mit uns , van articule to articule, alzo hirna screven steyt . . . Item zo en schole wy, Benyngmans alle vorbenomed, noch en willet offte unse erfnamen to nynen tyden sunderth vorbund maken mit den van Groningen, mit Hisseken van Emeden unde mit Folkmars, Ayeldes und Hayeken wederpartye, samentlike offte besunderen, dat keghen en unde keghen ere vrund ga. Unde weret, dat de van Groningen, van Emeden unde unse wederpartye hiirenboven Osterhusen unde Falren wolden wynnen offte bestallen, dat schal ik, Keno van den Broke, unde wille keren helpen mit lyve unde mit gude also ik ere ghedan hebbe . . . Alle desse vorscreven stucke, articlen unde wort unde der eyn jewelik besundergen, de hebbe wy, Kene van den Broke hovetlingh etc., Enne tho Hlerelte unde Sybrand van Loquarde unde wy, ghemenen Benyngh-mans vorbenomed, vor uns unde vor unse rechten erven, Folkmar, Ayelde unde Haycken vorscreven ghelovet unde sworen, lovet mit samender hant in guden truwen unde swered samentlike mit upperichteden vyngeren stavedes edes in den hilgen in dessen breve stede, vast unde unvorbreken to holdene, sunder arghelist. Unde wered, dat wy offte unser yenigh dat vorbreke, zo schole wy offte deghenne, de dat vorbroken hadde unde willet, van stunden an ryden in der stat to Monstere, also wy darto eschet unde manet werdet, unde holden dar en recht inlegher, nynerleye wijs dar weder uth to schedende daghes noch nachtes, eer dan unse gnedighe here van Monstere uns darumme in beyden syden vorscheden hebbe mit rechte. In orkunde der warheit, zo hebbe wy, Kene van den Broke etc., Enne to Hlerelte, Sybrand van Loquarde, Ymele Ydzardes, Hare in der Greeth, Enne to Norde, Enne to Pilsum, Dedeke to Pewesum unde Wygerd to Vysquarde, vor uns unde vor unse rechten erven uns inghezegele an dessen breff ghehenget laten. Datum anno Domini millesimo quadringentesimo quarto in die beate virginis Margarete.
