| Nummer:oub0200 | Datum:17. Juni 1406 | Überlieferung:Editie | Fundstelle:Ostfriesisches Urkundenbuch, I, S. 169, nr. 200 |
Folkeld, die Mutter Keno's tom Brok, bekundet und beschwört, dass ihre Schwiegertochter Adda von Norden kein Recht habe, gegen Adda von Hinte Ansprüche auf Ersatz von Schaden zu verfolgen, den Adda von Hinte's Vater ihr zugefügt habe.
Ik vrowe Folkeld, [*] Kenen moder, hovetlinghen to Broke etc, bekenne openbare in dessen breve unde betuoghe vor allen guoden luden, dat mi dat in der waerheyt witlik unde kuondich is, dat Adde van Hynte unde ere kyndere Imelo, Haro unde Sybbe van der ansprake unde anclaghe, de Adde Dyurledes dochter van Norde, mynes sones wiff, doyt unde ansprekt[*] uppe Adden van Hynte unde ere kyndere vorbenomd van schaden weghene eres vaders, den Got gnedich sy, dat Adde van Hynte vorbenomd unde ere kyndere erers vaders mer to schaden ghenomen hebbet unde in guode meer to achteren unde to hone[*] synt, dan ze synes ghenoten hebbet unde to voren wesen scholden; unde Adde mynes sones wyff, de en, mach ze dar mit rechte nicht umme anspreken unde ze zint eer mit rechte nicht plichtich van der ansprake weghene, dat neme ik uppe Got van hemelrike, wan ik des best behove unde uppe myne bedevart, [*] de ik nuo varen unde lesten wille to Lutteren[*] by Brunswik, dat mi dyt also witlik is unde in rechter warheit war is, unde betuoghe dat mit inghesegel Kenen mynes sones, hern Emmekens, commenduren to Abbingwere unde hern Almers to Butae in Broke kercheren, umme myner bede willen to ener waren betuochnisse vor my to dessen breve ghehangen, der ik bruoke in desser zake. Datum anno Domini Mo CCCCo sexto, in octava corporis Christi.
