| Nummer:oub0321 | Datum:Oldenburg, 29. Juli 1424 | Überlieferung:Editie | Fundstelle:Ostfriesisches Urkundenbuch, I, S. 285, nr. 321 |
Vorläufige Vereinbarung zwischen einigen Ost- und Westfriesischen Häuptlingen sammt der Stadt Groningen und der Stadt Bremen.
Int jaer unser Heren ghebort, do men screff dusent veerhundert in den veerundetwynteghesten jaer, des neghesten daghes sunte Panthaleonis, bynnen Oldenborch des stichtes van Bremen, in jeghenwardicheit des eerwerdighesten in Gode vaders unde heren, hern Niclaweses, ertzebisschoppes to Bremen, des edelen junchern Dyderkes, greven to Oldenhorch, unde der erbarn vorsichtighen wisen luden, hern Detmers van Tunen, Hinrikes Heygers borghermesteren, Lodewyges Krul unde Johans Cletzen, ratmanne, to der tyd sendeboden der stede Lubic unde Hamborch, unde anderer velen guden luden wart eyn vast, stede vrede unde vruntlik bestand vorramet unde ghedeghedinghet twisschen den ersamen borghemesteren, rade unde stad to Bremen uppe eyne zijd, unde den beschedenen wisen luden, borghemeysteren unde rade der stad Groningen, Haygen van Westerwolde unde Haygen Ripperdes uppe andere zijd, de ghegheven is der stad van Groninghen, Haygen unde Haygen vorscreven van den erbarn hern Dyderke Schorhare, Johanne Vasmer, Clawes Groninghe borghermeysteren, unde Hermanne van Gropelinghe ratmanne to Bremen, van der stad weghen Bremen; unde der vorscrevenen stad to Bremen van deme gheystliken manne broder Johanne van deme hilghen Gheyste, priore des conventes to Groningen Predeker ordens, sendeboden vulmechtich der sulven stad Groningen van der stad weghen to Groninghen; hern Almere, kercheren to Erle des stichtes to Bremen, unde Wybt van Stedestorpe rade unde to der tyd sendeboden junchern Ocken, hovetling to Broke etc., van Haygen unde Haygen weghen vorscreven, de anstaen schullen des sondaghes na Petri ad vincula neghest komende, waren unde duren wente Passchen darna neghest volghende. Unde darupp twisschen hyr unde sunte Michaelis daghe tokomende schullen broder Johan prior, her Almer unde Wibet vorscreven by der stad Groningen vorarbeyden unde bestellen, dat zee schele unde twydraeht, de twisschen den steden Bremen unde Groninghen uppghestaen synd, by den edelen junchern Dyderke, greven to Oldenborch unde Ocken erghenant off by de erbarn van Lubeke unde Hamborch rade, unde Hayge unde Hayge by den eerwerdighesten in Gode vadere unde heren, hern Niclawese ertzebisschopp to Bremen unde Ocken vorscreven setten in vrentschappen offte in rechte to vorschedene, also dat de raet van Bremen darto ghesat hefft unde des is by en ghebleven. Were over sake, dat de van Groninghen, Hayge unde Hayge vorscreven off erer welk des aljo nicht blyven unde van sich setten wolden, des sich nicht to vormodene is, so schullen de vrede unde vruntlik bestand allike wol in alle erer macht blyven unde woren to sulker. tyd, alse vorscreven is. To eyner betuchnisse unde bevestinghe alle desser vorscrevenen stucke so hebbet juncher Ocko van der stad van Groninghen, Haygen van Westerwolde unde Haygen Ripperdes weghen, unde Clawes Groning borghermester to Bremen van der stad Bremen weghen ere ingheseghele ghedrukket laten unde heten neden an dessen certer, der eyn uth dem andern ghesneden is.
