| Nummer:oub0373 | Datum:11. März 1429 | Überlieferung:Editie | Fundstelle:Ostfriesisches Urkundenbuch, I, S. 347, nr. 373 |
Schutz- und Trutzbündniss zwischen dem Häuptling Sybet von Ostringen und Rüstringen und den Häuptlingen Imelo Beninga zu Grimersum und Imelo zu Emden.
Ik Sybet hoefftling in Oestringen unde Rustringen enckenne unde betughe openbaer vor allesweme in dessen openen breve, dat ik vor my unde myne rechte erffghenamen my leefliken unde vruntliken hebbe ghesatet, bevruntschuppet, vorbunden unde vorbynde jeghenwordich in krafft desses breves myd den ersamen Ymelen to Grymerssum unde Hlerlte etc., unde Ymelen to Emeden hoefftlingen, unde eren rechten erffghenamen to ewigen daghen in desser wys hiir nae bescreven: Int eerste off jemand were bynnen off buten landes, Dudesch off Vresen, de duesse vorscrevenen Ymelen unde Ymelen, off ere rechten erffghenamen overvallen wolde myd veyden, myd last off anderer unrechter ghewallt in saken, daer sich de vorgescrevenen Ymelen unde Ymelo off ere erffghenamen beden ere unde rechtes to blyvende, to untkenninghe gueder lude Dudesch off Vreesch unde en dan nyn recht wedervaren mochte, dan zoe zall unde will ik Sybet vorscreven unde myne rechten erffghenamen soe wanneer ik daer to gheesschet werde van den eerghenanden Ymelen unde Ymelen off eren erffghenamen myd allen den ghenen daer ik mechtig byn, vorderlich, bystendich unde behulplick wesen, teghen de ghene, de alsodanne ghewallt unde unrecht an de vorscrevenen Ymelen unde Ymelen off ere erffghenamen keren unde weren zoe lange dat ik en ere unde rechtes helpen mach, dat zy binnen off buten Vreeslande ghelegen. Des gheliken zoe zolen Ymelo unde Ymelo vorscreven unde ere erffghenamen by my unde mynen erffghenamen wedder doen, daer uns dat also gheleghen were. Item off ik de Ymelen unde Ymelen vorscreven jenighe volghinge zolde doen myd mynen vrenden bynnen off buten landes, dan zoe zolen Ymelo unde Ymelo off ere erffghenamen alle voderinge unde unkost upstaen upp der zulfften reyse van der tyt, dat ik off myne erffghenamen by en komen unde wedder van en scheden. Des gheliken zoe zall unde wyll ik Sybet unde myne rechten erffghenamen doen off sich also ghevelle, dat Ymelo und Ymelo vorscreven off ere rechten erffghenamen myd eren vrenden my off den minen vorghescreven jenighe volginge zolden doen bynnen off buten landes. Desse vorscrevenen artikelen van woerde to woerden loven ik Sybet vor my unde myne rechten erffghenamen den vorscrevenen Ymelen unde Ymelen unde eren rechten erffghenamen also en gued kerstenmensche by myner ere stede, vast unde unvorbroken to holdene to ewighen daghen sunder alle arghelist, unde hebbe des to tuge mynen ingheseghell kentliken doen hanghen an dessen breeff, de ghegheven in na Godes boerd dusent veerhundert neghen unde twintich, des vrydaghes neyst deme sondage als men singhet in der hilgen kerken Letare.
