Die verbündeten Häuptlinge von Greetsiel, Eilsum, Uphusen, Esens und Stedesdorf und die Gemeinden aus Emsiger- und Brokmerland, dem Norder neuen Theil und Harlingerland schliessen nach Eroberung von Osterhusen mit dem Häuptling Imelo daselbst und Frederich zu Larrelt Frieden und bekunden die Bedingungen des Vertrages.
Wy Enno Edzardsna, Edzard unde Ulrick syne zoens hofftlynge to Greedsiil, Sybrant to Edelsum hofftlyng, Wyart to Uphusum hofftlyng, Wybet to Ezense hofftlyng unde Hero Oemkens to Stedesdorpe hofftlyng unde wy ghemenen meente in Emsghen, Broecmara, Norder nye unde Herlighen landen entkennen unde betughen openbare vor alsweme in dusser schriift, de ze lezen, zeen edder horen lezen, dat wy hofftlynghe unde ghemene meente vorghescreven hebben uns jeghenwerdich vrentliken, eernstliken unde leeffliken vordraghen, bevruntscappet unde besonet tot ewelken tyden myt den eersamen Imelen unde Frederick hofftlyngen to Oesterhusum, Grimessum etc. unde Hlerlte in maneren hiir na ghesereven: Int erste dat Imele vorghescreven wyl unde zal to ziik nemen to Oesterhusum up syne slot twelf guede mannes ute diessen vorscreven dren landen, als namentlike ute Emsghen, Broecmara unde Herlynghen landen, dar Imelen, Frederick vorghescreven an ghenoghet unde uns hofftlynghen unde der meente vorghescreven al went diesse unwylle tuschen Focken unde uns hofftlynghen unde der meente ghesloten unde ghezoent wert. Item so zal Imelo vorghescreven unde Frederick holden myt diessen vorbenompden twelft personen ghezellen van ere zulves knechten af, also veel dat se zulf teynde myt den twelf vorscreven dar uppe ziin, unde holden dat vorghescreven slot to oeren besten, dat uns hofftlyngen vorghescreven unde der meente dar gheen schaden ofte vordreet van en kame; welke vorghescreven twelff guede mannes zullen stede by Imelen beliven nicht to wesselen offte to wandelen eer dusse vorscreven unwylle endeghet ys. Item zo zal Imelo dat bolwerck to Oesterhusum ummelanck ueteffenen unde vervuelen[*] myt den ghennen, de dat ghevestet unde ghemaket hebben van stunden an. Item de borghere van Emeden zullen wedder trecken to Emeden velich unde vrii lyves unde guedes myt eren tughe myt den ghennen, de Focken unde Imelen provest brode[*] knechte synt. Item zo zullen de Hollanders unde Dudeschen ghezellen unde ute Rustringhe unde Oestringhe twelf van eer weghen trecken to Emeden in unde doen unde nemen eer rekenscup myt Focken, Imelen unde de borghers unde de ander zullen bynnen Oesterhusum belyven wente de vorghescreven twelf wedder kamen unde eer rekenscup slichtet unde ghedaen hebben, als vorghescreven ys, velich lives unde guedes bynnen Oesterhusum also lang to wezen, unde wanner ze dat ghedaen hebben, so wylle wy hofftlynghe vorghescreven unde ghemene meent dusse vorghescreven ghezellen als Hollanders, Dudesche unde Vreze, als Rustringhe unde Oestringhe, gheleyden to watere unde to lande by nacht unde by daghe to varen vrii unde velich lives unde guedes in ere zulves landen to varen unde to trecken, buten Emeden to schepe gaen, unde dusse vorghescreven zullen dar wyssynghe[*] vor doen, dat se uns hofftlynghen unde meente[*] vorghescreven ghene schaden noch vordreet doen zullen dewyl dat se van hiir trecken ofte varen, unde went se in oer zulves lande kamen to doene gheliik eren lantluden. Item alle noodloffte, de in dusser veede ghedaen ofte ghescheen ziin, zullen wezen vrii unde qwyt van beyden siiden. Item de vanghen, de van beyden siiden vanghen synt, zullen wezen vrii unde qwyt, de vanghen vor vanghene to gaen, sunder vordreet. Item alle vordreet unde unwylle, wes ghescheen ys in dusser veede, zal doet ziin van beyden siiden unde vrentliken unde leeffliken vorgheven sunder jenighe weddersprake. Item alle de ghenne de van Loppersum, Suderhusum, Hynte unde Grimessum in dusser veede myt Imelen vorscreven orleghet hebben, zullen wedder uppe dat oer als se dat vynden vrii, velich lives unde guedes. Item Frederik vorscreven zal hebben bruken unde besitten syne loech[*] to Hlerlte went dyt orlech ghezoent ys, als he in voertiden ghehat hefft, syne guedere unde herlicheyd de syn beleghen war de beleghen syn, in welken landen, butes landen und bynnes landen, unde wes he vorantworden unde holden mach myt een lantrecht, des ghelikes zal Imelo vorghescreven oek doen. Item zo zullen de bure to Oesterhusum wezen vrii, velich lives unde guedes, unde unvordrucket unde unvorunrechtet. Item so zullen Imelo unde Frederick sitten in gueden vreden unde vrentscap unbedwunghen van uns hofftlynghen unde meente vorghescreven to dussen orleghe unde van alle menen Vrezen. Item so zal Poepke[*] wezen gheliik den Emderen borgheren also velich als de borghers van Emeden in Emeden to trecken, offt he borgherrecht bynnen Emeden holden wyl gheliik anderen borgheren to Emeden myt syne tughe, deenre unde knechten, als he van Emeden ghekamen ys. Welke vorghescreven punte unde artikele wyllen wy hofftlynghe unde meente vorghescreven Imelen unde Frederik holden stede, vast unde unvorbroken vor uns vorghescreven unde vor alle menen Vrezen unde alle den ghennen, de umme unsen wyllen doen ofte laten wyllen sunder alle arghelist, nye vunde, hulperede unde hemelik valscheyt uetghesecht. In orkunt dusser warheyt unde merer bevestenisse, so hebben wy Enno, Edzard, Sybrant, Wyart, Wybeth unde Hero vorghescreven unse ingheseghele int spacium dusses breves ghedrucket, dar uns allen vorghescreven hofftlynghen unde meente an ghenoghet, int jar unses Heren MCCCCXXX, des hylghen sacramentes daghe.
x
| Bestand |
Ostfriesisches Urkundenbuch, I |
| Fol. Nr. |
S. 356 |
| Nr |
385 |
| Olim |
Nach dem Orig. in Besitze der Gesellschaft für bild. Kunst etc. zu Emden, woselbst auch eine ungenaue Abschrift Saec. XVII. Msc. A. 1 Fol. 262. Msc. A. 28. Rathsarchiv zu Emden, Abschrift Saec. XVII. — Gedr., jedoch nicht nach den Original, bei Harkenroht S. 258, Matthaeus S. 239, Brenneysen S. 52, Lünig, Spic. Sec. I, S. 785. |
| Jahr |
1430 |
| Datumcode |
Sacram |
x
| Editionen |
E. Friedländer, Ostfriesisches Urkundenbuch I (Emden 1878), nr. 385 |
