Hauptseite

Nummer:oub0447

Datum:26. Okt. 1435

Überlieferung:Editie

Fundstelle:Ostfriesisches Urkundenbuch, I, S. 408, nr. 447

Regest

Das Kirchspiel Marx unterwirft sich dem Grafen Dietrich von Oldenburg und bekundet die näheren Bedingungen.

Wy Memme Menssone, Oye Gayekessone, Nanneke, Kampehaye, Bunne, Redeleff, Kampeke Rode Hermens swager, Remet, Rennet, Lengenertamme, Hinrik de kroger, unde Fouwe enkennet openbare in dessen breve vor allesweme, dat wy van des gansen kerspels wegene to Markese[*] uns leffliken unde vruntliken hebben vordregen unde vorgan mit dem eddelen juncheren Diderike greven to Oldenborch unde synen erven in sulker wis so hiir nascreven steit: dat wy en willen unde scholen to ewigen tiden truwe unde holt wesen, de wile dat wy leven unde nummermere ere argeste to donde ofte to wetende noch nachtes eder dages hemeliken ofte openbar. Ok so en wille wy unde scholet en jewelik in unseme kerspele wanaftich greve Diderike unde synen erven vorscreven des yars to allen sunte Vites dage geven achte Bremer grote to knechtgelde, unde we dar ene egene ploch heft, schal en to allen sunte Michaelis dage darna geven ene tunnen roggen unde ene tunnen haveren. Buwet dar ok we mit ener halven ploch, de schal en geven ene halve tunnen roggen unde ene halve tunnen haveren, unde den wille wy unde scholen en yo lesten to deme Konenvorde.[*] Overst wonede dar ok welk wedue, de nicht en bouwede unde egen roeck[*] hadde, de schal en geven alle yar ver Bremer grote dar vor, dat me ze vordegedinget; wer ok dat unser en ofte meer eder wy alle tiegen den greven ofte synen erven vorscreven eder oren amptluden besecht worden eder oft unser en den anderen wes to to seggende hadde ofte tiegen em wes vorbreke, we dar umme beschuldiget wert, de mach sik des entladen na Vreschen rechte oft he kan; kan he overst nicht, so schal he dat den greven ofte sinen erven vorscreven beteren na gnade ofte na rechte, unde we dar nyne schult an en heft, de en derff des nicht entgelden. Ok schuldiget unser en den anderen, dar broke an is, dat wille wy unde scholet dat vorclagen unde vorvolgen vor den greven ofte synen erven eder eren amptluden vorscreven; welk unser den wes heft vorbroken, den broke scholen se deger unde al upboren unde en alle desse vorscreven stucke, articulen unde word, unde der en jewelik bisunderen love wy Memme, Oye, Nanneke, Kampehaye, Bunne, Redeleff, Kampe, Remet, Rennet, Lengenertamme, Hinrik unde Fouwe alle vorben. vor uns unde dat ganse kerspel to Markese, den eddelen greve Diderike unde synen erven vorscreven in guden truwen in dessen breve stede unde vast to holdene, unde hebbet dat mit unsen upgerichteden liffliken vingeren stavedes edes to den hilgen gesworen sunder alle nygevunde, hulperede unde argelist utgespreken, unde hebbet des to tuge unses kerspels ingesegel mit guden willen witliken gehenget heten to dessen breve. Na der bord Christi verteynhundert yar dar na in deme vieff unde dertigesten yare, des midwekens vor Symonis et Jude.

Recto:

«‹›»