Urfehde des Scheltke, Tyen Sohn, aus Neermoor,geleistet dem Hamburgischen Amtmanne zu Emden.

Witlik unde openbar sy allen erbaren guden luden, de dessen breeff zeen edder horen lesen, dat ik Scheltke, Tyen soen ut Edramora, [*] bekenne unde betughe openbaer in dessen openen breve, dat ik mit vryen wilkoer unde wolberadenen mode hebbe ghedan orveyde den van Hamborch unde deme hovetmanne to Emeden in desser nabescreven wise, so dat ik hebbe lovet unde ghesworen stavedes edes mit uprichten vingheren to den hilleghen, love unde swere jegenwardighen in dessen openen breve den van Hamborch unde deme hovetmanne to Emeden unde den van Emeden unde eren vrunden, de mit en sint in vorbunde, truwe und hold to wesende lives unde gudes, unde nummer tyeghen se te donde myt rade offte myt dade, sunder alle arghelist. Vurder so love wy Tyge, Scheltken vader, Ulfert syn halffbroder ut Symeswolde[*] unde Swittert syner suster man mit samender hand vor uns unde unse erven alle de punte, de Scheltke vorbenomed lovet unde ghesworen hefft unde also vorscreven ys, stede unde vast to holdende unde nummer in to brekende, sunder alle arghelist. Wert over sake, dat he desse sone so nicht en helde alse vorscreven is, unde jerghen mede vorbreke, dat men em mochte over bewysen, so schole wy vorscr. borghen vorbroken hebben an den hovetman to Emeden twehundert Arnsche[*] gulden. Alle desse vorscreven stucke love wy Tyge ut Edramora, Scheltken vader, Ulfert ut Symeswolde unde Swittert ut Symeswolde vorbenomet stede unde vast to holdende sunder alle arghelist. Des to tughe unde merer bekantnisse der warheit, dat uns, her Rolff kercher ut Edramora, Tamme Zywerdzen to Borsum hovetlingh, und Gherld Egghena to Emeden, alle desse vorscreven stucke witlik unde kundich synt, so hebbe wy unse ingheseghel umme bedes willen witliken ghehanghen heten nedden to dessen breve. Gheven unde ghescreven na der bord Christi dusent veerhundert in deme sess unde druttigisten jare, des neghesten maendaghes vor unser leven Vrouwen daghe assumpcionis.

x

x

Bestand	Ostfriesisches Urkundenbuch, I
Fol. Nr.	S. 417
Nr	458
Olim	Original im Archive zu Hamburg.
Jahr	1436
Datumcode	LaAssMar

x

x

Kommentar	Siegel: 1. Unkenntlich, S. Rodolphi . . . 2. Der h. Georg oder Michael,den Lindwurm tödtend, Umschrift: Sivitson (?) . . . in Bors . . . . 3. Eine Hausmarke.

x

Material	papier

x

Editionen	E. Friedländer, Ostfriesisches Urkundenbuch I (Emden 1878), nr. 458