Hauptseite

Nummer:oub0583

Datum:Dokkum, 17. Sept. 1447

Überlieferung:Editie

Fundstelle:Ostfriesisches Urkundenbuch, I, S. 510, nr. 583

Regest

Kloster Dokkum verkauft dem Propst Johannes Vredewold zu Emden das früher vom Kloster Palmar besessene Vorwerk Bohnenburg.

Wy her Willam abt, her Johan prior ende heer Wybrant koster ende ghemene conventslude the Dockum ende heer Reyner prior ende her Jacopp, keller the Waerde, bekennen ende betughen mit dessen openen brieve, dat wy hebben verkoft ende tieghenwoerdich verkopen den eersamen doctore, proest ende cureyt, heer Johan Vredewold tho Eemda, dat voirwarck thoe Bonborch mit alle syn toebehoer, huis ende hoff, lant ende sant, bynnen dykes ende buten dykes, als die van Palmaer in voirtyden pleghen thoe gebruken ende van rechte thoebehoerden, voir een somme gheldes, die ons voll ende all betaelt is. Hieromme soe overdraghen wy ende machtich maken heer Johan voirscr. dat voirscr. voirwarck mit syn thoebehoer als voirscr. is, vry thoe ghebruken ende the verhueren, the verkopen ende anders the orbaren, hoe dat hem ende sinen arffghenamen nut ende orbar duncket the wesen sonder alle argelist ende nyevonde. In orkonde ende in een tughenisse der waerheyt, soe hebben wy her Willam abt, prior ende ghemene conventeslude the Dockum voirscr. ende her Reyner prior ende her Jacob keller thoe Waerde the Dockum ons conventes seghell mit ons abbets zegel an dessen brieff gehangen, ende om meere vestenissen wille, soe hebben wy gebeden den eersamen vader, her Tymannus, gekoren abbet the Werum ende onse visitator in Vriesslant dessen bryeff om onsen wille the beseghelen; ende ick her Tymannus gekoren abbet the Werum voirscr. om beden wylle her Willams prior ende ghemene conventeslude the Dockum voirscr. ende her Reyner prior ende Jacob keller toe Waerde voirscr. hebben onse segell an dessen brieff gehanghen. Gegeven int jaer ons Heren dusent vierhondert ende acht en veertich, opp sunte Lamberts dach bisscop ende martelier.

Recto:

«‹›»