| Nummer:oub0700 | Datum:7. März 1456 | Überlieferung:Editie | Fundstelle:Ostfriesisches Urkundenbuch, I, S. 613, nr. 700 |
Derselbe bekundet, dass Sippe, die Frau des in der vorigen Urkunde genannten Heelpo, beim Eintritt ins Kloster sich auf Lebenszeit und für ihren Gatten, wenn er sie überleben sollte, den Genuss ihrer säumtlichen beweglichen und unbeweglichen Habe vorbehalten hat.
Wii her Heuwe commendur unde ghemeynen brodere des conventus to Gemgum bikennen unde bytugen openbaer vor alsweme myt dessen unsen byzeghelden openen breve, dat Syppe Heelpens uppe den Wenynghermore myt uns her Hewen etc. unde broderen des conventus to Gemgum hefft gut enket byscheet unde vaste vorwort van eres eghenen gudes weghene ghemaket, do ze to uns ghenck to kloster myt Heelpen vorghescreven eren echten manne yn dessen nabyscrevenen wyse, alzo dat se mach unde schal bruken to eren lyve to erer eghene behoff unbystraffet al ere erve unde gut ynne Garbadaherna gheheten, unde wat dar anders meer boven yn den Wennyngermoer is byleghen, unde darto mach se ere eghene ynguet unde anders replick guet unde ynghelt byneten tu eren eghenen nuttesten unde besten to eren lyve, unde na eren levende schal unde mach Heelpe vorghescr. ere echte man, offte God ene lengher spaerde an deme levende, dessulven vorghescreven gudes gheneten unde bruken vortan to synen lyve. Zunder wanner se dat beyde naghelaten hadden, scholde erer beyder guet, dat se naleten an den dode, scholde al unde degher blyven an de ere Godes unde sunte Johannis by deme clostere to Gemgum tu ewighen tiiden. Dat dat waer unde vast ys als vorghescrevenen steyt to merer tuchnisse willen, zu hebbe ik her Hewe commendur vorghescr. unses conventus inghezeghel unde myn eghene mede myt willen unde vuelboert alle unser brodere witliken ghehanghen byneden to dessen breve. Anno Domini MoCCCCoLVIo, ipsa dominica quadragesimali Letare.[*]
