Häuptling Snelger zu Uphusen verkauft mit Zustimmung seiner Frau Ocka, seiner Mutter und seiner Brüder dem Tiabbere Tiarcksna zu Wirdum 33 genau bestimmte Grase Landes für 235 Rhein. Goldgulden.

Ick Snelger, to Uphusum hovetling, enkenne unde tuge openbar an dessem breve vor allen ersamen vromen luden, de ene zeen, horen offt lezen, dat ick myd vrien willen unde vorberaden mode, myd consent unde vulbort Ocken mynre echten husvrowen, by witscop Hissen mynre moder, Mennen und Omeken mynre broder, hebbe vorkofft unde vorkope jegenwordich in und myd krafft desses breves to enem steden vasten ewigen erffkope deme bescheden manne Tyabbern Tyarcksna to Wirdum wonaftich dre und dartich grase landes, warvan viff grase belegen synt buten dykes uppe Maende, item 4 grase up Ockoloend uterdick; item eyn half gras ock up deme uterdyke by dem Maende; item twe grase tillandes belegen inna Hoyer; item anderhalff gras ynna Teler; item derdehalf gras tillandes ynna Kortenortyuch; item vif grase meedlandes ynna Haringes loend; item dre verdendel van enem grase ynna Heroffen; item twe grase unde eyn verdendel inna Roleffs comper; item sevedehalff gras fenlandes ynna Albernstyuch; item verdehalf gras inna Maerfen. Welck vorgenompt land dem ergenanten Tyabbren samptliken vorkofft in vor ene summe geldes, als bynamen twelff stige golden Rinsche gulden myn vif Rinsche gulden, welke vorscr. summe my Snelger vorscr. deger und al de erste pennynck myd deme lesten wal vornoget und betaelt is, des ick eme dancke; unde were zake dat jement in tokomen tyden up sodane vorscr. land unde koep dechte spreken offte jengerleye anklage to donde, des ick my doch nycht vormodende byn, soe wil ick Snelger vorscr. unde schal, edder myne rechte erven, boren unde ungeboren, dem vorscr, Tyabbern offte synen rechten erven, boren off ungeborn, edder holder dessen breves dit vorscr. land tho ewigen tyden rechtes kopes vor alle ansprake geistlikes und wartlikes rechtes warende wesen toe holdende, brukende, besettende und to vorkopende, offt woe eme und synen erven darmede belevet toe donde, sonder argelist, hulperede und nyevunde. Hiir hebben mede, by, an unde over gewesen de ersame Edo Boingsna, hovetling to Godensen, Johan van Wynsem, Abel van Sagel, borgermesters to Emden, mester Ebo unde Edzart toe Uphusum unde anders veler guden lude genoch. Desses toe merer bekantnysse unde warheit soe hebbe ick Snelger vorscr. myn ingesegel unde Menne, myn broder vorscr., syn ingesegel an dessen breff gehangen. Vorder so hebbe ick vruntliken gebeden de ersamen mans Wiard to Uphusum hovetling to Oldersum, Egbet Boingsna, voget to Emden, umme ere ingezegele an dessen breff to hangende, dat wi Wiard und Egbet vorgerort umme Snelgers vorscr. bede wille gedaen hebben. Gegeven na der bord Cristi M^oCCCC^o negen unde vifftich, des mandages na Paschachten.

x

x

Bestand	Ostfriesisches Urkundenbuch, I
Fol. Nr.	S. 640
Nr	741
Olim	Orig. im Besitze des Grafen Edzard zu Inn- und Knyphausen auf Lütetsburg.
Jahr	1459
Datumcode	LpQuaMod

x

x

Kommentar	Siegel: 1. und 3. zerbrochen, 2. Rechtsaufgerichteter Löwe, Umschrift:...Mennonis H.....rda capitalis in Mei....-. 4. Ein halber Adler, unter dem Flügel ein fünfstrahliger Stern. Sigillum Egberti Boinck in der Birk (?).

x

Material	papier

x

Editionen	E. Friedländer, Ostfriesisches Urkundenbuch I (Emden 1878), nr. 741