Bündniss zwischen den Häuptlingen Tanno Duren, Lubbo Onken und Alko zu Inhausen einerseits und Edo Boings und Sirk zur Friedeburg andererseits, namentlich zum Schutz der Friesischen Wedde.
In den name Godes. Amen. In deme jare unsses Heren dusent veerhundert in deme sostigesten, des dages sancti Blasii, hebben wii Tanno Duren tho Jeveren, Rustringh, Ostringh unde Wangherland, Lubbo Onnyken tho Krypensen, unde Alko tho Inhusen hovetlinghes uppe ene, Ede Boynghes tho Godensen unde Syrik tor Vredeborgh unde Repsolte hovetlinghes uppe anderen siid uns vorplychtet unde vorbunden, vorplychten unde vorbinden uns yegenwardich kraft dessen breves tho ewigen tiiden in desser nabescreven wiise. Uft dar yemende wonende were in deme wede uppe den unssen edder unsser undersaten, unsser frunde unde alle de yenne, de umme unssen wyllen don uft laten wyllen, yd were tho Varle, Buchoren, Jerynghave uft Thyadeshusen, [*] yd were wor yd were, dar wii uft unsse undersaten unde vrunde myt rechte up tho klagende uft tho sprekende hebben, dat wyllen wii samptliken unde endrachtlyken vorbidden, vordedinghen na allen unsen vermoghe unsse rechtycheyt unde unssen undersaten van beyden delen. Were over sake juncher Gerd oft syne tostendere wolden dat keren, uns uft den unssen van den eren tho dringhende unde dat eer afhandych maken, dat wyllen wii samptliken unde endrachtliken keren myt live unde gude wor wii konen unde moghen. Uft juncher Olrick tho Gretsiil, Norden etc. unde Sybo tho Dornum, Esensen etc. hovetlinghes hulpere worden junckeren Gerdes vorscr. baven synes vaders zeegele unde breve, de wii unde de lande van em hebben, dat wyllen wii unde scolen malckanderen helpen keren na alle unssem vermoghe. Vortmer were ock yemend beseten in Tannen Duren, Lubbe Onnyken uft Alken ghebede uft landen, dar de genante Ede unde Syrick oft eer erven unde undersaten mochten wormede besculdigen uft anklagen myt rechte, so scolen unde wyllen de genante Tanne, Lubbe unde Alke ze vermoghen, bestellen unde selten zee tho rechte; inghelike Tannen, Lubben unde Alken eren erven unde undersaten wedderumme bescheen scal van den viilgenanten Eden unde Syrke. Ock uft dar weren knechte uft undersaten der genanten Tannen, Lubben unde Alken, unde vorvloegen oer gebede unde bred umme oveldat wyllen, dar zee dat mede vorbroken hedden, unde begerden der genanten Eden unde Syrke ghebede uft denst tho wesende, so scolen de viilgenante Ede unde Syrik zee nycht entholden in ereme ghebede unde denste, men toven zee, unde senden see deme, dar see dat mede vorbroken hebben, so den genanten Eden unde Syrike wedderumme bescheen scal. Ock scal unsser eyn nycht sonen myt desseme vorscr. junckeren Gerde edder myt synen thostenderen, id en sii myt des anderen wyllen unde samptlike in eyner sone unde veyde tho blivende. Alle desse vorscr. stucke laven wii Tanno Duren, Lubbo Onnyken, Alko, Ede Boynghes unde Syrik tor Vredeborgh hovetlinghes vorbenomed myt uthstreckeden armen, uprychteden vyngheren in den hylgen to ewiigen tiiden bii unssen cristliken treuwen stede, vast unde unvorbroken tho holdende sunder yenigherleye arghelist in aller vorscr. geferde, unde hebben des tho eyner orkunde unsse inghesegele hanghen laten benedden to dessem breve. Datum ut supra.
x
| Editionen |
E. Friedländer, Ostfriesisches Urkundenbuch I (Emden 1878), nr. 752 |
