| Nummer:oub0764 | Datum:22. Sept. 1460 | Überlieferung:Editie | Fundstelle:Ostfriesisches Urkundenbuch, I, S. 661, nr. 764 |
Mehrere Geistliche und Laien, nämlich die in der Urkunde vom 12. September dieses Jahres als Schiedsrichter in Aussicht genommenen, bekunden im Beisein Junker Ulrichs die am Tage vorher zu Aurich erfolgte Beilegung des Streites zwischen Tanno zu Jever und Sibo zu Dornum wegen Wittmund, unter Bezugnahme auf den Vertrag vom 19. Mai 1456.
Wytlick unde kundich zii allen erbaren vramen luden, de dessen breff zeen, horen ofte lesen, dat wy her Bebbe to Grotehusen pravest, her Albert to Haghen kerckher, Wiard to Oldersum hovetlinck, Eme to Norden, Arndt Krels to Marienhave, vogede, am sondaghe na Lamberti[*] to Aurike syndt ghewesen in jeghenwardicheit des ersamen juncheren Olrickes to Gretsyl, Emeden, Aurike, Norden, Berum, in Ostvreslande, hovetlinck, unde wy vorscr. personen syndt overbodich ghewesen, dar Tanne Kancken to Dornum hovetlinck jeghenwordich was, dat wy Tannen to Jever hovetlinck, de uppe desse vorscr. tydt personliken sulvest uppe eynen velighen dage was bynnen Aurike, unse vullenkamende recht darvor tho donde, dat wii vorscr. personen dar mede an unde over syndt ghewesen, zo de ersame juncher Olrick unde Wyard to Oldersum hovetlinck am LVI jare, des mydwekens to Pinxten[*] ene vruntlike schedinghe unde slete hebben gemaket van alssodaner schelinghe unde twydracht, alss twuschen Tannen vorscr. unde den ersamen Syben, to Dornum, Esense, Stesstorpe, Witmunde hovetlinck, van der herlickheit weghen mit aller tobe horinghe in Osterlingher lande in vruntschuppe hebben verscheden in desser nascrevene wisse, na lude des recesses, dat darup ghegheven wart, so dat Sybo vorbenompt unde syne erffnamen, baren unde anebaren, de herlyckheit (Witmunde) myt aller tobehoringhe schal besitten, hebben unde bruken gelick alss Tanne Kancken tovoren ghedaen hefft. In orkunde unde merer tuchnisse desser schedinghe hebben wii her Bebbe pravest, her Albert tho Haghen kerckhere, Wiardt tho Oldersum hovetlinck, Eme to Norden, Arndt Krels to Marienhave, vaghede, unse inghesegele laten drucken beneden uppet spatium desses breves. Gegheven am daghe Mauricii et sociorum eius, anno LXo.
