| Nummer:oub0838 | Datum:14. April 1466 | Überlieferung:Editie | Fundstelle:Ostfriesisches Urkundenbuch, I, S. 726, nr. 838 |
Prior, Priorin, Seniorin und die Nonnen zu Nyenkloster verkaufen dem Grafen Ulrich von Ostfriesland all das Erbe und Land im Kirchspiel Eilsum, welches die Priorin Enka von ihrer Mutter geerbt hat.
Wy broder Petrus prior, suster Enka priorisse, suster Reinka unde suster Styne senioren myd den ghemenen conventes volke tom Nyencloster bekennen unde betugen apembaer in dussem breve vor allen ersamen guden vromen luden, de ene seen offte horen lesen, wo wy myd consent und vulbort des erwerdigen in God vader und heren, hern Thien unses paters, abbeth to Witwerum, hebn myd guden vrigen willen und vorbedachten mode vorkofft unde vorkopen tegenwordich in und myd krafft dusses breves to enen steden vasten ewigen erffkope deme edelen walgeboren heren, greve Ulrike to Norden, Gretsyll, Emeden, Auwerke, Berum etc., heren in Oestvreslande, unde synen rechten erven, geboren unde ungeboren, sodane erve edder land, als dar vorscr. sustere Enken priorissen is angeervet van erer seligen moder, belegen in deme caspell to Edelsum, das sy gelegen waer unde up wat steden in deme sulften caspell dat belegen sy, und sy ock geheten wo ed sy geheten, vor ene summe geldes, de uns unde unsem convente de erste pennyngh myd dem lesten deger und all guetliken wall betalet, vornoget und entrichtet is, des wy eme hochliken dancken; so dat wy unde unse convente unde conventes nakomelinge, boren ende ungeboren, willen unde schullen deme vorscr. heren greve Ulrike unde synen rechten erffnamen, boren und ungeboren, sodane ergescreven erve vrig und qwiit, ledich unde loss, sonder alle ansprake gheystlikes und wartlikes rechtes, to ewigen tyden warende wesen, to holdene, to besittene, to brukende, to vorsettende und to vorkopende, wo en darmede belevet to donde sonder argelist, hulperede unde nye vunde. In eyn tuchnysse der warheit so hebben wy vorgescr. personen vruntliken gebeden den upgenanten unsen leven patere, hern Thien abbet ergescr., umb syn ingesegel an dussen breff to hangende, deme ick Thilemannus abbeth ergenant, na dessen uns susdanige koep mede witlick is, also gedaen hebbe. To vorder bekentenysse der warheyt so hebbe ick broder Petrus vorscr. myn ingesegel van des conventes wegen by des vorscr. unses paters ingesegel an dussen breff gehangen. Na Godes bord dusent veerhundert ses unt sestich, des mandages na Paschachten.
x
| Bestand | Ostfriesisches Urkundenbuch, I |
|---|---|
| Fol. Nr. | S. 726 |
| Nr | 838 |
| Olim | Orig.: Kl. Wittewierum, Urk. Nr. 2. |
| Jahr | 1466 |
| Datumcode | MpPasche |