| Nummer:oub0984 | Datum:29. Okt. 1476 | Überlieferung:Editie | Fundstelle:Ostfriesisches Urkundenbuch, II, S. 83, nr. 984 |
Häuptling Edo Wiemken zu Jever bekundet den von ihm auf Bitten des Rathes von Bremen zwischen Lübeck und Hamburg und dem Iko Onken zu Knyphausen und den Kindern Alko's von Inhausen auf 3 Jahre geschlossenen Friedensvertrag. (Vergl. Nr. oub0978 und oub1021)
Ik Ede Wymmyke, to Jevere etc. hovetling, enkenne opembare in desseme breve vor allessweme, dat ik dorch bede unde vorforderinge willen der erlijken radesheren der stad Bremen unde dem gemenen besten to gude, hebbe vorhandelt, begrepen unde vorarbeydet een gudtlijk unde frundlik bistand, velicheyd unde vrede twischen den ersamen rederen der stede Lubeke unde Hamborch uppe de eyne, unde Ike Onnyken to Krypensen, ok seligen Alken nagelatene kinderen, hovedlinges, uppe de anderen siden; welk bistand, felycheyd unde vrede anstande was nu Mychahelis negestvorgangen, durende sunder middel de dre negeste jare erstvolgende na datum desses breves; des so hebbe ik van des erbenomeden Iken to Kripensen unde seligen Alken nagelaten kinderen wegene unde de ore den vorscrevenen rederen der stede Lubeke unde Hamborch, oren borgeren, undersaten unde allen den jennen, de se mit rechte vorbidden unde vordegedingen mogen, geredet, lavet unde gudtsegt, rede, lave unde gudsegge jegenwardich in unde mit krafft desses breves vor desset bistand, velicheyd unde vrede wol to holdende to watere unde lande sunder alle argh unde bosen wan. Des to eyner getuchnisse hebbe ik Ede hovetling erbenomed myn ingesegele wijtliken hangen heten benedden to dessen breve. Gegeven na Godes bord veerteynhundert ame soessundsoventigsten jare, des negesten dages na Simonis und Jude, der hilgen apostele.
