| Nummer:oub1027 | Datum:10. Jan. 1480 | Überlieferung:Editie | Fundstelle:Ostfriesisches Urkundenbuch, II, S. 112, nr. 1027 |
Der Häuptling Ubbo von Upleward und der Vogt von Emden schlichten einen Streit zwischen dem Kloster Langen und dem Dodo Kenesna über den dem Letzteren vorenthaltenen verdienten Lohn zu Gunsten Dodo's, dem sie 80 Arensgulden zusprechen.
Wy Ubbe, hovetling to Pleuwert, unde Haro Wyneken, [*] voghet to Emeden, enkennen unde betughen apenbair in dessen apenen bezegelden breve, wo dat voer uns is ghewest Dode Kensen unde was clagende op dat cloester unde op den provest to Langhen, also dat he den cloester gelt geleent hadde, unde oeck was clagende umme syn vordende loen, also dat wy Ubbe hovetling unde Haro voget vorscr. hebben dat an ons ghenomen unde hebben den provest, als bi namen Johannes Bommel[*], unde Doden ghescheyden also, dat de provest vorscr. sal den vorben. Doden gheven veer stighe Arnsegulden, unde daermede alle zaken doet. Welkeer veer styghe Arnsegulden ick Dode vorser. my bekenne, dat my de vorben. Johannes Bommel, provest to Langhen, de guetliken unde wal betaelt unde vernoget hevet den ersten penninck myt den lesten, in teghenwordicheit desser nabescreven tuge, des ick eme hoechliken dancke, also dat ic Dode vorscr. dat cloester to Langhen quytschelde, unde ick of nemant van mynre wegen nummermeer bet ansprake to hebben of to doen op dat vorscr. cloester van geleenden gelde of van arbeydesloen van Sebastiaens den provest, of Adrianus den kelre wegen, sonder jenigerleye argelist. Desses to tuge hebben hyr mede, by, an unde aver gewesen John Hoerneman, Florys scutemaker unde Dirck Coster, borgers in Emeden. In orkunde unde merer bekantenisse der waerheit so heb iek Ubbe hovetling vorscr. myn ingezegel wytliken beneden to dessen breeff heten hangen van erer beyder wegen. Screven na der bord Christi Mo CCCCo unde LXXXo, op den manendach na der hilliger drier coninge dach.
