| Nummer:oub1284 | Datum:5. Juni 1491 | Überlieferung:Editie | Fundstelle:Ostfriesisches Urkundenbuch, II, S. 323, nr. 1284 |
Das Kloster Sielmönken tauscht mit den Junkern Dido Manninga zu Lütetsburg und Edzard zu Pewsum u. s. w. genau bestimmte Ländereien aus und begleicht eine kleine Flächeninhaltsdifferenz durch Zugabe selbstgefertigter Ziegelsteine.
Frater Arnoldus, prior, ende ghemene convente der regulier orden in Sylo enkennen unde tughen in denen apenen besegelden brieve, dat wy myt vryen willen, walvorbedachten moden, volmechtich unser synnen, hebben gewesselt ende in krafft dessen brieves teghenwordich wesselen tot ener ewiger stedigher erfwesselinge mit den edelen walghebaren junckeren, joncker Dydo Manninga van Lutedesborch ende Bergum, ende synen leven broder joncker Edsart van Peusum, van Jendleth ende Wachwaert, onse viertien grase landes myn eyn vierdel in Manslachter hammercke in drie stucken beleghen, die sess grase int suden by de vors. joncheren lande, int norden by des vicarius to Pilsum sess grase, int oesten by Nonne Ubben twelff grase ende int westen by Gayke Schroders landt to Manslacht, ende synt ghehieten Eliff, die vyff grase inn eenre vennen van achte grasen, ghehieten torphan, ende strecken int oesten an tyanham, int westen an Grietmannerwech, int norden an den leemwech ende tut suden an Synelts tho Jendleth vier grase. Item die drie grasen myn eynn vierdel in eyn venne van acht grase int suden van der vennen, in welcker die hilligen to Pilsum hebben vyff grasen, ende eyn vierdell streckende int oesten an Meneborgers cleyne werff, int suden an der hilligen tho Pilsum vyfftehalff gras, ende int westen an derselver hilligen drie grase tegens hoer viertien grase in Loquarder hammerick, beleghen mytten noerder eynde an Loquarder martenwech, int suden an Focken Aggen camp, ghehieten kanneram, [*] int oesten an Gilliff Adden twelff grase, ghehieten incael, int westen an vrou[*] Ocken lant to Uphusen, wael tot onser beyder ghenoeghe, dat eyn gras om dat ander gewesselt myt sodanighen vorwerden unde beschede, dat wy den vorbenoemden joncheren sollen togeven vor dat vierdell grases, welc hoer lant merer is, dreedusent steens van ons tychelwerck byt cloester, welc wy oeck em vol ende al wal vernoeget hebben. Ende willen voirt ende sollen wy ende unse nakomelinge den vorbenoemden joncheren dese voirs. viertien grase min eyn vierdel vry ende onbekommert toestaen ende warende wesen voir alle ansprake in gheestlicken offte werltliken rechten, war des to doen were, also dat se dat vors. lant moghen ghebruken, verwesselen offte vorcopen ende al horen willen darmede doen sunder al arghelist, hulpreden ende nye funden to eewigen tyden. Hier weren mede, by, an ende aver als tugheslude dartho gheroepen die ersamen mannen herr Ulrich, kerckher tho Peusum, Focke Heren und Lippe Thyalken, buermans doersulves. Int eyn vorder tuychnisse der warheyt hebben wy onser conventsseghel doen hanghen bereden an dessen brieff. Int jar ons Heren duysent vierhundert eyn und tneghentich, up des hillighen martelars dach Bonifacii myt synen ghesellen.[*]
