| Nummer:oub1666 | Datum:Wissel, 12. Okt. 1500 | Überlieferung:Editie | Fundstelle:Ostfriesisches Urkundenbuch, II, S. 637, nr. 1666 |
Herzog Heinrich von Sachsen u. s. w. bekundet, dass die den Grafen von Ostfriesland für ihr im Interesse des Feldzuges gegen Groningen geleistetes Darlehen von 25000 Goldgulden verpfändeten Schlösser und Länder, jetzt nach dem Vergleiche Herzogs Albrechts mit der Stadt Groningen sequestrirt würden, und erst dann wieder Pfandobjekt werden sollten, wenn dieses Gebiet dem Herzog Albrecht vom Reichskammergericht zugesprochen worden, sonst aber würde die schuldige Summe baar erlegt werden.
Wir Heinrich, von Gots gnaden hertzog zcu Sachssen etc. ..., ... ewiger gubernator in Friesslandt, bekennen offentlich hirmit ..., als der hochgeborne furst unser lieber vater loblicher und seliger gedechtniss, herr Albrecht, hertzog zcu Sachssen ..., den edeln und wolgebornen unsern besondern lieben und getreuen herrn Edezardt und herrn Hugo, gebrudern, graffen zcu Ostfriesslandt ..., umb der getreuen dienste willen, so sie seiner liebe und uns in den kriegsleufften gegen den von Gruningen gethan, auch mit einer antzal kriegesvolgkh gedient, dessgleichen den Dham, Dellffzeill, Otterdham und andere besetzunge in den umblanden ein zceytlanng uff ire eygen cost seiner liebe und uns zcu guete und provit underhalten haben, derhalben sein liebe inen schuldig ist worden dy summa benantlich funff und zcwenczigthausent guldin an golde, darvor sein liebe gemelten graffen als fur sechszehenthausent guldin die beyde schlosser Otterdham und die Pekelborgh genant mit dem Alden ampt und das dorff Bellingwolt, und fur die annder neunthausent guldin den Dham, Dellffzeill mit andern schlossern, dorffern und umblanden zcwischen der Embs und das Gruninger thiff gelegen, verschryben und in ire handen gestalt habn ... ., und nachdem aber itzo ein verfassung zcwischen gemelten unserm vater und der stad Gruningen aufgericht ist, das alle umblandt in der hochwirdigesten, hochwirdigen, hochgebornen, wolgebornen, ersamen unser herren und frundt und besundern lieben der churfursten, fursten und ander stende des heyligen reichs, und in irem namen in des edeln unsers besundern lieben heren Georgen vom Thorm handen sullen van beyden teylen gestalt werden bis zcu rechtlichem ausstrage vorm camergericht, und so nu gemelte ... herr Edezardt und herr Hugo, graffen zcu Ostfriesslandt, dyselbigen obgerurten schlosser, dorffer und umblanndt, unsers vaters begerten nach, wyderum zcu seiner liebe und unsern handen gestalt haben und wir dyselbigen umblandt in handen unser frundt der churfursten, fursten und ander stende des reichs und in irem namen in herrn Georgens vom Thorm, wie oben verkleret, gestalt haben, haben wir gemelten graffen zcugesagt und sagen inen zcu wyssentlich, und versprechen inen, iren erben und nachkummen, fur uns, ... szo uns dy umblandt bey dem cammergericht zcugesprochen ader anders in eynigerley weyse wyderumb eyngeantword werden, das wir denn sunder eynige wegerung, verczog oder behilfft inen ader iren erben den Dham, Delffzcil, Otterdham mit dem Alden ampt, schlossern, dorffern und allen umblanden zcwischen der Emss und das Gruninger thieff gelegen, nichts abgescheyden, wyderumb einantworden sullen, und wullen inen auch dyselbigen umblande, sedte (!), schlosser und dorffer sunder eynig eintrag ader bespering in masen, wie unser vater inen die verschriben hath, brauchen und geniessen lassen, doch voirbehalten in solichen allen uns, unsern erben und nachkummen, das wir soliche ort landen ubir kurtz ader langkh zcu allen zceyten und so oft uns das gutdungken ende gefallen wil, nach laut unsers vaters verschreybung wyder ablosen mogen, und sullen uns, unsern erben und nachkummen gemelte graffen, ir erben und nachkummen, soliche ort landes nach anczall der abgelosten summa sunder wegerunge volgen lassen. Als sich auch begebe, das uns soliche umblandt mit rechte durch das camergericht abgesprochen ader wye die anders abhendig wurden, szo wollen wir gemelten graffen ..., soliche summa geldes ... bynnen zcweyen jaren negestvolgende der rechtsprache des cammergerichts, szo wir uns versehen in dysem jare zcu beschehen, nach laut unsers vaters vorschreybung in yr sicher gewalt bynnen der stadt Embden an allen iren schaden und unkosten vergnugen und beczalen, oder sie in denselbigen Friesischen landen mit gewissen renthen nach irem gefallen geborlieher weyse versorgen sonder eynig verzcog ader wegerung, auch an allen eindrag, exception ader behelff, wie solichs erdacht mocht werden, alles getreulich und ungeferlich. Zcu urkundt und steter haldung und beweysung haben wir unser furstlich insiegel unden an dysen brieff wyssentlich thun hencken, der gegeben ist zcu Wyssel, auf montag den zcwelfften tag vom October, nach Christi unsers Heren geburt ins funffzehenhundirdisten jare.
