| Nummer:oub1733 | Datum:Emden, 21. Juni 1400 | Überlieferung:Editie | Fundstelle:Ostfriesisches Urkundenbuch, II, S. 692, nr. 1733 |
Henning van Rintelen und Albert Schreye bekennen, dass sie 25 Vitalienbrüder begnadigt und in ihr Geleit genommen haben, und dass Herr Almar, dem sie diese Urkunde in Verwahrung geben, jedem von ihnen eine Abschrift desselben ausstellen darf, wenn er derselben benöthigt ist.
Wy Heningh van Ryntelen van Lubeke, ende her Alleberd Screyge van Hamborch, hovetlude, van der stede weghen, de uppe desse tyd to Emede synt, bekennen openbare an dessem breve, dat wy hebben entfanghen to ghenaden itlyke vyttallyenbrodere, dat syn Vresen, umme des meynen kopmans beste wyllen, de in Vreslandes syden pleghen to varne, alse de vyttallyenbrodre vorgescreven by namen unde by tonamen hir naghescreven stad, alse: Remmeke Gherdessone, Hayo Gheltekana, Terrynk Offens, Udeke Hansson, Syvad Mammensone, Udeke Udensen, Wyneke Alrikessone, Eppo Epnson, Benno Nonsson, Enno Akkena, Ekko Ekkerdesson, Agho Ditmarsson, Lubbe Luddana, Bolko Bogensson, Habbe Mertenson, Affeke Brunsson, Rembot Menrikesson, Merten Boltson, Wybbolt Tzybana, Luocuos Johannessone de schomakere, Enno Schuette, Eggo Kobensson, Hero Rembotes, Alrik Ebbana unde Wylbolt Gherledesson, de uns hebben ghelavet unde sworen an den hyllyghen, dat se jummer mere tho watere noch to lande den kopman schullen beschedighen, noch helpen to beschedighende, unde wor se wittallyenbrodere weten, de schuollen se helpen to vorvolgene; des wy en hebben besegelt seker gheleyde unde velychheyd in allen steden, war se des to wanderne unde to kerne hebben, unde hebben to truower hand her Almer dessen bref bevalen to bewarende: wor se des to donde hedden, eyn jewelyk besunderen edder tosamende, dat den steden edder den kopman to nenen schaden moghe kamen, so schal her Almer desse vorgescreven materien eynem jewelyken umme ore velicheyd under synem ingesegele den bescriven, dar se to eren lyve unde sunde an vorwared syn. In orkunde der warheyt, so hebbe wy Henningh unde Albred vorgescreven unse ingesegele wytlyken ghehanghen laten an dessen breff, de gheven unde ghescreven is to Emeden, in deme vyrteynhundersten jare, des mandaghes vor suntte Johannes daghe tho myddemesamere.
