Johan van Haefften, landcommandeur van de Duitse orde, balije van Utrecht, bekrachtigt voor buren te Witten de verkoop door de commandeur te Bunne aan de abdij Assen van een rente van 8 mudden winterrogge, 4 mudden "manckzades" en 4 mudden havermolt uit Ykingheguet en Bonekingheguet te Witten in het kerspel van Rolde. Met bezegeling met de zegels van de (Duitse) huizen van Utrecht en te Bunne.

Wij Johan van Haefften landcomptuer der balyen van utrecht duytsscher orden bekenne in dessen openen bezegelden breve
voir onss ende voir onse naecomelinge dat alsulken coepp als her Wolter van Overhagen comptuer toe der tijd toe
Bunne ghel;egen in den lande van Drenthe ende in den kerspel van Vrees ghedaen hefft myt joncfrou Golden Stellinx abdysse
dess cloesters van Assen ende oeren conventsluden ewelike ende erfflike stede vast toe bliven als van acht mudde wynter
roggen veer mudde manckzades ende veer mudde haverenmolts dess iaers welke mudde voirscr. onse hues to Bunne
voirscr. hefft jairlix hent tot datum desses breves gheboert ende ghemaent uut Ykingheguede ende Bonekinghe guede
ghelegen toe Witten in den kerspel van Rolde voir ene summa gheldes die onss vol ende al betaelt is tot onsen willen die
leste pennyng myt den eersten Ende wij Johan van Haefften landcomptuer voirscreven bekennen myt dessen yegenwordigen
bezegelden breve dat dyt onse wille ende consent ghewest is ende onsen willen dair toe gheven overmids mede toestaen
onser ghemeenre balyen voir alsoe dat wij overgheven ende overghegeven hebben qwijtschescholden ende qwijtschelden
mynre vrouwen der abdissen voirscreven ende oeren conventsluden desse mudde als voirscreven is toe bezitten ende die toe ghebruken
toe ewyghen daghen dair van den eghendoem als dat wij noch onse naecomelinge toe gheenre tijd dair opp meer
hebben toe spreken. Ende hyr entends soe hebben wij hyr van verteghen alle rechtes ende eyghendoems toe behoeff
mijnre vrouwen der abdyssen ende oeren conventsluden voirscreven ende den stock hyr van gheleget als een landrecht is in
Drenthe. Ende wij Johan van Haefften landcomptuer voirscreven ende willen mijnre vrouwen der abdyssen ende oeren
conventsluden voirscreven hyr van rechte waersscapp doen tot allen tijden voir onss ende voir onse naecomelinge ende voirt
voir alle dieghene die dess toe rechte komen willen toe landrechte woe vake hem dess noed ende toe doende is Alle
argelist ende wes men dessen vorwairden ende coepp voirscreven toe hinder vynden mach hyr in uutghesecht. Hyr weren
aen ende over Steven ter Borch ende Tydeman Avynghe als dedingeslude Alekin Schultinghe, Johan Roderix ende
Johan Tydens over dat stockleggen als buere toe Witten voirscreven. In orkonde ende in een tuech der wairheit soe hebben
wij Johan landcomptuer voirscreven voir onss ende onse naecomelinge onses huses segel van Utrecht voirscreven aen dessen
breeff beneden doen hanghen. Ende om meer sekerheit willen want de mudde voirscreven onsen huese toe Bunne voirscreven
pleghen toe behoren soe hebben wij dat segel dess selven huses van Bunne voirscreven mede aen dessen breeff ghehangen.
Ghegeven inden jair onss heren dusent veerhundert ende acht ende vijfftich opp der elven dusent maghede dach.

x

x

Archief	Drents Archief
Fonds	Arch. Abdij Assen
Inventarisnr.	94
Regestnr.	69
Jaar	1458
Datumcode	XImVir

x

x

Commentaar	De 2 zegels zijn verloren.

x

Materiaal	perkament
Afmeting (mm)	250/145-150

x