Johan van der Eze, zoon van heer Henric van der Ese, zijne vrouw Soete en hunne kinderen Henric, Mechtelt en Soete dragen over voor buren van Westerheslen aan de abdij van Dickenijnghe en van Rune een pacht van l Deventer mud rogge uit Telminghe-gued te Westerheslen, afkomstig van tienden, waardoor zij op dat goed geen recht behouden.
Wy, Johan van der Eze, heren Henrix sone van der Ese, Soete, mijn wijf, Henric, Mechtelt ende Soete, onse kindere, doen kunt ende kenlic alien luden , die dessen brief solen sien oft horen lesen, dat voer ons selven ende voer onse rechte erfgenamen erflike vercoft hebben ende vercopen mit dessen tjegenwordighen brieve den abte ende den ghemenen convente van Dickenijnghe ende van Rune een mudde rogghen Deventer mate, dat wy jaerlix hadden over Telminghegued tot Westerheslen, rorende van tyenden, om ene summe van ghelde, die ons ende onsen gherechten erfghenamen wittelic ende wal bitaelt is. Ende mit dessen cope voerscreven schelde wy ende onse rechte erfgenamen quyt ewelic ende ummermeer Telminghegued voernoemt van alien tyenden ende van alre ansprake, die wy daerover hadden. Ende hebben opghelaten mit dessen brieve ende laten op den abte ende den convente voerscreven dit mudde rogghen voer den buren van Westerheslen als een Drenthes lantrecht is. Ende omdat wy willen, dat desse dinghe voerscreven vast ende stede bliven solen ende wittelike ende wal gheholden werden van ons ende van onsen gherechten erfgenamen, soe heb ic, Johan van der Ese voernoemt, desen brief biseghelt mit minen seghel voer my selven, voer Soeten, mijn wijf, voer Henric, voer Mechtelde ende Soeten, onse kindere ende voer onse gherechte erfgenamen, want sie selven ghene seghele en hebben. Ende wy, Soete, Henric, Mechtelt ende Soete voernoemt, belyen desser saken voers. under Johans seghel vornoemt ghelijc alsoftet onses selves seghel were. Ghegheven int jaer ons Heren MCCC achte ende vijftich des Wonsdaghes na onser Vrouwen dach te Lichtmisse.
