Gheert van der Hofstede schulte in het kerspel van de Ywehorst oorkondt, dat Wolter WiLLEMSzone opdroeg aan de abdij van Dickenynghe al zijn land to der Hofstede.

Ic, Gheert van der Hofstede, in der tijd een ghesworen schulte mijns lieven heren van Utrecht in den kerspel van der Ywehorst, bekenne in dessen openen brieve, dat voer my ghecomen is int gherichte in enen ghehegheden heymale, daer ic dat gherichte sat to der Hofstede, Wolter Willemszone ende lyet daerup ende gaf mijt sinen vryen willen ten ewighen daghen den abt ende den ghemenen convente van Dickenijnghe al sijn lant, dat hie ligghende hadde to der Hofstede mijt hoghen, mit zyden, mit egghen, mit eynden, mit torve, mit twighe, mit water, mit velde ende mit alle sinen rechten tobehoren, alsoe alst to der Hofsteden gheleghen is. Ende Wolter voerscreven vorteech daer (voer) my, voer hem ende voer sine erfghenamen van dessen voerscreven guede erflic ende ewelic to behoef des abts ende des ghemenen convents voerscreven, mechtich siinre sinne ende selven mondich, al arghelist uytgheseghet. Hier waren over ende by gheropen alse tughe Willem Pauwelssone, Willem ter Lanchorst, Johan to Boghenijnghe ende anders gueder lude ghenoech. Ende ic,
Gheerd voerscreven, um bede willen van beyden zyden in kennisse der waerheyt heb ic dessen brief open beseghelt mit minen seghele. Ghegheven in den jaer ons Heren MCCC neghen ende neghentich up den zes ende twintichsten dach van der maent in Meye.

x

x

Archief	Drents Archief
Fonds	Arch. Abdij Dikninge
Toegangsnummer	440
Inventarisnr.	1
Fol.nr.	fol. 35v
Regestnr.	133
Jaar	1399
Datumcode	2603

x

x

Materiaal	perkament

x

Edities	O1030