wolter van AuERHAgHEN commandeur te Bonne van de Duitsche orde, johan van den cloester, johan stellinck drost te Couerde en ambtman van het land van Drenthe, en otto hanersouwe bepalen-, als scheidslieden van de abdijen te Dicke-ninge en te Assen en van de buren van Anrepe in het kerspel van Rolde, - de markescheiding tusschen Halen en Anrepe; en beslissen, dat de buren van Anrepe den Makelhorst zullen behouden en de buren van beide marken dat Gelebroeck gelijkelijk zullen gebruiken. Met vermelding der opmaking in triplo: een voor ieder der beide abdijen en een voor de buren van Anrepe.

Wij Wolter van Averhaghen Commelduer toe Bonne dueyschens oirdens, Johan vanden Cloester als ghekoren segeslude van weghen
des Eerweerdeghen heren Henrickes van Wijcroden Abdt toe Dickeningen ende der Eerweerdegher vrouwen Golde Stellingen
abdisse toe Assen ende hoeren convent ende wij Johan Stellinck droste toe Coverde Amptman des landes van Drenthe ende
Otto Hanersouwe als segeslude van weghen der ghemeenre buren unde erffgenamen van Anrepe ghelegen inden kerspel van
Rolde doen kond allen luden alsoe alst twijst unde schelinge gheweset is tusschen den voirscreven heren Abdt van weghen
des cloesters toe Dickeningen unde des cloesters toe Assen an een sijde ende den voirscreven buren unde erffgenamen van Anrepe
heerkomende van eenre ghemeenten geheten dat Gelebroeck overmits enen merkenganc die die buren voirscreven hadden ge-
gaen an die ander sijde welck den voirscreven heren unde vrouwe der twijer cloesteren van Dickeningen unde van Assen voirscreven
om toe nae ducht wesen. Soe sijnt die twee pertyen voirscreven van beyden tsyden oir gebreke unde schelinge verbleven an
ons vijr segeslude voirscreven een seggen unde uutsprake dair van toe doen. Ende wij bekennen dair omme in dessen apenen
breve dat wij die sake unde die gebreke unde schelinge averlacht unde doirgesijn hebn unde doen onse seggen unde
uutsprake in maniren unde vorwerden hijr nae bescreven Te weten inden ijrsten dat die steen die op den steenwech licht
een merkenscheit bliven sall tusschen die van Anrepe unde die van Halen. Ende op den voirscreven steen salmen een cruce houwen
unde den makelhorst sult die bure van Anrepe voirscreven beholden tot eweghen daghen. Ende voirt an soe is onser vijrre
voirscreven seggen dat die merkenganc ende die stene die sie gesat hebn van ghijnre weerden sullen wesen. Ende voirt soe
is onser vijrre voirscreven seggen dat die voirscreven bure van Anrepe ende van Halen voirscreven sullen gelijke bruken ende weyden
dat Gelebroeck voirscreven tot eweghen daghen toe alsw sie dus lange gedaen hebn. Ende voirt soe is onse seggen dat men den
steen die die abdt van Dickeningen voirscreven heft ghevoirt uut den broke willen die voirscreven bure van Anrepe den
dair weder hebn soe moeghen sie willeghen die vijre die den in voertijden dair gesat hebn dat sie den dair weder
setten buten den abdt voirscreven Ende voirt soe segge wij vijre voirscreven dat dat convent van Dickeningen unde van Assen
voirscreven ende die bure van Anrepe voirscreven hijr mede sullen ghescheiden wesen tot eweghen daghen toe. Als bij eenre
penen van hondert franker schilde Sonder argelist. Des toe oirkonde unde toe tughe der waerheit soe hebn
wij segeslude van beyden tsijden voirscreven elck onse zegel an dessen apenen breve gehangen welker breve dree
sijn alleens inholdende dair die voirscreven abdt enen sall van hebn toe behoeff des cloesters van Dickeningen ende die
abdisse van Assen voirscreven den anderen van sal hebn toe behoeff ons conventes voirscreven unde die buir unde oer erfgenamen
van Anrepe voirscreven den derden. Gegeven int jair ons heren dusent vijrhondert vijr ende tsoventich des saterda-
ghes nae onser liver vrouwen Assumpcio.

x

x

Archief	Drents Archief
Fonds	Arch. Abdij Dikninge
Toegangsnummer	440
Inventarisnr.	55
Regestnr.	308
Jaar	1474

x

x

Materiaal	perkament

x

Commentaar	De zegels van W. v. A., J. S. en O. H. zijn verloren; met geschonden zegel van J. v. d. C. in groene was.