Mijnen ganss willigen denst steeds unde beforen
Edele unde Erentveste. Soe kan ick Juu Erentvesten
nicht vorontholden dat ick Jw Erentvesten brieve
untfangen hebbe den Inholt verstaen, Soe kan ick
Jw Erentv. nicht verbergen: woe dat Gerhardus van
Langen als scriver tho Wedde als vulmacht van Roeleff
van Reden twe breven heft op Edes arve: de eijne
breff den Inholt is 40 Enckede goldt gulden unde
40 phlips gulden der van des Jars eijn verndeel
botteren unde 2 phlips g. van gegeven wordt
unde soe heft zal. Johan Edens gerekent mijt zal.
Anna van Reden Roleff van Redens grote moder de sick
dusse breven als nu an maetet unde de pennigen
nu fordert mijt de Renten soe hebben zal. Johan
Edens unde Anna gerekent als anno 59 doe is Johan
Edens schuldich bleven eijn fath botter unde 8
phlips gulden: Des spreken se nu alle de Renthen
an als van dato 59 up dussen dach [...]dder tijdt (so ick
Recht bericht bijn) soe isset also, als ick hijr gess:
hebbe: soe hebben se de landen tho geslaegen dar ick
hijr Eijn Copia ut dat mandaet bij voege unde willen
uth de landen betalt wesen Rente unde hoevetstoll
Soe mosten Juu Errentv: hijr in voersijen mijt tzampt
Juu Leve Suster Johanna De Meppesche de welche
de Helste der moet van verdedigen Sus willen se
sick in de landen laten Richten tot hoer quota (
soe als se vernemen) Ick sijn In korten daegen bericht
van Eijen gueden frunde die Edens arve is vercundigten
worden alle de gene de dor Ansprake up hadden sulden
hoer Ansprake laeten antekenen, doe hadde Roleff
van Reden sijn Ansprake nicht laeten antekenen: dar
hadde der Erentv. zal. Joncker Haije eijne verzegelinge
van untfangen, dar mochte mijn Herschup nae vorne-
men ofte de bij mijn Herschup wer Edder bij Jw Leve
Suster Johanna de Meppesche, Soe dat also wer:
Soe wer Roleff van Reden vorsteken in sijn Anspra-
ke mijt sijn zegel unde breven, ock sulde ijck me-
nen dat idt soe Eijn lange tidt gestaen heft unde
se hoer Renten nicht gefordert hebben, Solde hoer
breven vor slaepers geachtet worden, dan mijn Herschup
mach aldaer tho Groningen spreken mijt wijser luiden
woe dat In Groningen geholden wordt In woe korter
Edder lange tidt Eijner kan verstiken worden de sijne Rente
nicht In forderen is up behorlicke tidt unde laet se eijn
so lange tidt staen woe dijt gedaen heft (Soe als se
seggen) mij solde duncken mijn Herschup Solde
an Hans van Dorpen scriven dat he Autentick Copia
mochte geven ut alle hoer bescheidt, dar mochte mijn
Herschup sick wijders als dan up belenen, Dijt moet
wedder gestaen worden sus willen se sick laeten Anrichten
Ick hebbe up dijt mandaet tidt genoten dar dusse
Copia van is tot vastelavent. mijn Herschup mochte
mijt flijte vornemen nae de vors. vorzegelinge ofte se bij
mijn Herschup wer Edder bij Jw leve Suster Joha-
nna de Meppesche Ick hebbe Jw leve Suster
Johanna de Meppesche ock ges. van dusse dungen
wente se willen hoer halff gelden, Soe mij godt [...]t
wil ick aldar bij mijn Herschup umme trent mijth vasten
koemen: mijn Herschup mach sick nicht laeten vorlangen
Ick wijl selvest koemen unde betalen de huere
Ilens Vrescheloe mitz bevelinge godt almechtich tot lanck
wiliger gesuntheit unde zaliger wolvart Actum den 24ten
februarij anno 85.
Juu Erentvesten guedtwilliger und guede
frundt in allens
Hermannus Nanniges pastor in
Vreschelo und commisarius
der herlicheit Wedde.

x

x

Archief	Groninger Archieven
Fonds	F.A. Lewe
Toegangsnummer	547
Inventarisnr.	0010
Jaar	1585
Datumcode	2402

x

x

x

Materiaal	papier