Herzog Adolf zu Schleswig und die Stadt Hamburg beurkunden den von der Stadt Bremen vermittelten Waffenstillstand mit dem Junker Ulrich Cirksena.
Wii Aleff van Godes gnaden, hertoghe to Slesswyck, greve to Holsten, Stormeren unde Schowenborch, unde wii borghermeistere unde radmanne der stad Hamborch bekennen unde begheren witlik to wesende alle den ghennen, de desse scrift zeen edder horen lesen, dat de erwerdighe here hern Frederik, abbet to Reynevelde, unde de duchtighe knapen Wilken Vrese unsse hertoghen Alves, unde de erbaren her Johan Vrese, borghermeister, unde her Hinrik Cloke, radman to Bremen, dersulven stad Bremen sendeboden, twischen uns unde junckhern Olrike to Norden unde Ezensen etc. hovedlinghe, Wigerde to Uphusem unde den eren enen vrundliken upslach unde vrede hebben vorramed, de anstan scholen des neghesten sondaghes na unsser leven Vrouwen daghe nativitatis[*] neghest komende unde waren wente uppe sunte Michahelis dach dar neghestfolghende, [*] den dach al, sunder alle arghelist unde hulperede. Hirup so is en dachvard twischen uns unde deme ergen. junckhern Olrike unde Wigerde binnen Stade uppe sunte Lamberti dach[*] erstkomende to holdende vorramed, dar wii unde desulve junckher Olrik sulven tor stede komen scholen unde willen; unde de ghenne, de to der dachvard komende werden, scholen vor uns unde de unsse unde alle de ghenne, de umme unssen willen don unde laten willen unde van rechte scholen, uth unde to hus velich wesen; unde binnen desseme vrundliken upslaghe unde vrede willen unde scholen wii an beiden siden nenerleie bawete noch veste in Vreslande upslan, buwen unde maken unsser een deme anderen to vorvanghe unde schaden. Hedden wii unde de ergen. junckher Olrik to der seward jenighe uthghemakede lude, den wii vor desseme vorscreven sondaghe desset nicht witlik don unde de to hus eschen konden unde de na demesulven sondaghe jenighen schaden deden in rove, dotslaghe, wundinghe unde jenigherleie wiis anders, sodanne vanghen scholen quiit van der venknisse werden ghelaten, de gudere schal men weddergheven, unde dotslach unde wundinghe scholen bliven sunder maninghe. To groterer witlicheid desser vorscreven stucke hebbe wii hertoghe Aleff vorben. unsse ingheseghel unde wii borghermeistere unde radmanne der stad Hamborch unsser stad secret hanghen heten to dessem breve. Gheven na Godes bord verteinhundert jar, darna in deme twe unde viftighesten jare, des sondaghes vor unsser leven Vrouwen daghe nativitatis.
