Die Häuptlinge Ocko in Loquard, Ailt in Grimersum, Ailt in Hinte, Gerd in Petkum, Haye in Papenburg, Beno in Uttum, Eger Kankena und Hero Maurits huldigen dem Grafen Ulrich I. von Ostfriesland.
Witlick, kundich unde openbaer zy allen unde enen isliken edellen, strenghen, duchtighen heren, knapen, amptluden, richtern, hovetlinghen, ersamen erbaern vorsenyghen vromen luden, gheistlick unde wertlich, woe dat wy Ocko to Loquard, Ayelt tho Grymessum, Ayelt to Hynte, Ghert to Petkum, Haye tor Papenborch, Beno to Utthum, Egher, Tanne Kancken sone, unde Hero Maurizes, hovetlinghe, hebben ghehuldighet, ghelovet unde gheswoern deme edellen vormoghenden heren, hern Ulrike to Norden, Grietzyl, Emeden, Aurike etc., greve in Oestvriesland, unseme rechten heren unde synen kynderen truwe unde hoelt to wezene, syn unde syner kindere beste to done to allen ghetiiden unde dat argheste to kerende nach all unsen vormoghe, waer wy des mathe unde macht hebben sunder all arghelyst unde gheverde, ghelyck eyn islick guet man syneme rechten heran plichtich ende schuldich is to done. In eyne tuchnisse der waerheyt desser vorgheroerden puncten hebben wy samptliken vorghenomden hovetlinge offte knapen unse ingheseghele guetwillich witliken ghehanghen an dessen brieff. Ghegeven to Emeden, nae der bort Christi unses Heren dusent vierhundert, daernae in deme viff unde tsestighesten jare, ame vrygdaghe nae Johannis ante portam latinam.
