Vertrag der Gräfin Theda und des Grafen Enno I. von Ostfriesland mit Hero Maurits und Hicko von Dornum über die Friedeburg.
Wytlick, kundich unde openbair syd alle denghennen, de dessen openen bezegelden breff zehen offte horen lezen, woe dat eyne vruntliche unde entlike stantafftighe scheydinghe ghedegedinget unde ghemaket ys tuschen den eddelen unde walghebornen vrowen, vrowen Theden, gravynnen, junckheren Ennen, synen broederen, graven in Oestvriesland, by der enen, unde den duehtigen ende erberen Heren Maurizes, to Dornum unde Vredeborgh hovetling, meyster Hycken in den keyserrechten licenciaet, proest to Emeden unde to Dornum hovetling, van der andern syden, umme schelinge, ghebreke unde unwyllen upghestaen unde vorresen van der Vredeborgh unde sus van allen anderen saeken unde schelinghen, dair jenich unwille ende twydracht van ghekomen weer effte mochte komen hebben in tokomene tyden, unde dat in maneren unde formen hijrnae bescreven. Int eerste, soe schall de erbenomede Hero Maurizes overgheven ende overandworden de Vredeborch myd alle synen tymmere, lande, sande, wyschen, weyde, heyde, lande, lueden unde heerlicheyt, even alze he dat in besitte ghehat hevet, unde dat in de hande unde were der eddelen gravynnen, junckhern Ennen unde synen broedern, graven vorg., nu to Paeschachten erstkommende, unde de eddelen vrowe Thede, juncker Enno unde syne broedere schollen vernoeghen unde betalen den erberen Heren Maurizes effte synen erven den schaeden syner vengknysse, bowe unde terynghe, de he darvan gheleden unde upghedaen hefft effte vorkostighet voir viffdusend Rinsguldene. In welkeren summen eme betaelt ende vornoeghet synnen eyndusend Rinsguldene, [*] und dat ander ghelt sall ueth nae tyden unde stunden hijrnae bescreven. Int eerste, soe schollen de eddele vrowe Thede, juncker Enno unde syne broedere vornoghen den erbern Heren Maurizes offte synen ervent, eer he de Vredeborgh overghifft nu to Paeschachten erstkomende anderhalff dusend Rinsguldene, de neghenhundert in enkelden goldenen Rinschen guldenen, unde de seshundert in andern gueden payemente, alze hijr ins lande ghenghe unde gheve ys voir syn gheweerde. Item dairnae nu to Paeschachten voirt over eynen jare int jaer van twe ende tachtighen oek eyn dusend Rinsguldenen in ghelde ghenghe unde gheve voirgheroerd. Item dairnae des Paeschachtenden voirt umme dat jaer drehundert Rinsgulden unde alsoe vort an elkes Paeschachtendes jo drehundert guldene to betalene in payemente hijr im lande ghenghe unde gheve voirgheroert, hen tor tyd thoe, dat de viffdusend Rinsgulden all betaelt synnen, unde alsoe vakene alze Hero Maurizes yenighe summen gheldes van den ghelde vorgheroert entfeyt, soe sall dairup ene quitancien gheven van alsodannen entfangenen summen to ytliken tyd. Oek ys mede bedeghedinghet, dat Hero Maurizes unde syn ervent schall beholden to synen besten alle de erve unde guedere, de he in der heerlicheit tor Vredeborch liggende hefft effte eme ghegeven effte in broeke ghedaen synnen iffte ghekoft hevet, unde dairto hundert deymede landes liggende in Reepsolter hamrike neghest Dyckhuser hamrike, wair eme dat bequemest ys, dat he unde syn erven moeghen brueken to ewigen tijden sunder jemandes weddersegghent, dair nycht geghen to brueken gheystlick effte wertlick gherichte. Welckeer erve de erbere Hero vorb. sall uthwysen, eer effte waneer he de Vredeborgh overghifft. Oek ys ghedegedinget, dat Hero Maurizes sall beholden de vier meyere up deme Ryspele myd alle den ackerlande, dat dair licht by der westersyden des weghes mit den wyschen, de se dairto brukende synnen. Soe dat he unde syn ervent moeghen dairmede doen wes en bequeme ys, unde de meyere sollen Heren effte synen erven den tyns unde de hure gheven unde sollen denstvryg wesen van den heren tor Vredeborch unde tynsvryg, unde konnen de vorg. meyere wes densten doen, den sollen se Heren ofte synen ervent doen offt se wes densten van en begheren. Men desulfften meyere sollen oer recht soeken tor Vredeborgh ghelyek andere undersaten. Oek mach Hero Maurizes unde syne ervent syne schaep up deme Ryspele holden ane jemandes weddersegghent. Oek ys mede bedeghedinget, dat Hero Maurizes vorb. mach unde sall beholden dat reetscap, dat nu tor tyd tor Vredeborgh uppe der borch in van bussen, ketelen, potten unde bedden, dat he macht laten affforen to synen willen myd synen anderen haven unde guederen, behalven teyn bedde myd oren tobehoeryngen, dair de knechte up slaepen, sollen blyven by der borch. Id ys oek mede bedeghedinget, dat meyster Tyaerd unde Hicko Boyenges unde sus andere, de oer erve unde guedere in der herlickheyt ligghende hebben, de se nu in besitte hebben offte anders myd rechte en to behoren unbespeert ende unbehindert sollen ghebrueken, unde de eddelen vrowe Thede, juncker Enno unde syne broedere en to eren rechte sollen behulpelick wesen. Vorder ys oek mede bedeghedinget, is saeke, dat de eddelen vrowe Thede, juncker Enno unde syne broedere Heren Maurizes voirb. effte synen ervent der borchstede, steenhuse, voirborch myd denen coelthune to Dornum up der westersyd des loghes van Ayelde to Hynthe nicht en konnen vryen effte quyten, so schollen de eddelen vrowe Thede gravynne, junckher Enno unde syne broedere, graven upgenant, Heren Maurizes effte synen ervent dairvoir betalen vierhundert Rinsgulde in ghelde hijr im lande ghenghe nae den termynen unde betalingen der eersten viffdusend guldenen. Voirtmeer is mede bedeghedinghet unde gesloten, dat de eddelen unde walgebornen vrowe Thede, gravynne, unde juncker Enno, grave, voir sick unde syne broedere sollen vorseghelen voir sick unde ore erven to ewighen tyden Heren unde Hicken Maurizes vorb., eren ervent unde anervent de herlicheit to Dornum, nomptliken twe kerspele, alze Dornum unde Reesterhove myd alle oren vorfalle unde rechticheit in havenen, lande unde lueden, soe se dat van keyserlicker macht hebben in besitte ghehat unde hebben, unde wyllen densulfften Heren unde Hicken Maurizes, gebroederen, erven und anervent, to eren rechten behulpelik wesen unde beschermen myd unsen landen unde landen nae unsen vormoghe beschudden unde beschermen, offt jemant weer, de se myd ghewalt offte unrechte wolde overfallen. Unde wy Hero unde Hicke veleghenompt loven voir uns unde unse erven unde anerven to ewigen tyden in krafft desses breves densulfften eddelen unde walghebornen vrowen Theden gravynnen, junckhern Ennen unde synen broederen, erven unde anervent, dat wy by en wyllen unde schollen doen myd lyve unde guede nae alle unser macht, ghelijck guede schiltbortighe mann schuldich synnen to done by oren rechten natuerlichen landesheren sunder alle arghelyst unde nyge quade funde. Oek ys mede bedeghedinget, dat Hero unde Hicko Maurizes vorb., oer ervent, undersaten, Hicke Boynges unde syn erven schollen wesen tollenvryg durch de Vredeborch uth unde to hues, unde offt se wydenbusch wolden houwen dorch de Vredeborch effte dairby moghen se doen ane jemandes insegghen sunder tollen unde ghelt. Vorder woerde oek saeke, dat Heren Maurizes vorb., in tokomene tyden jemant wolde anlangen umme de Vredeborch effte umme jenighe sacke dairvan heerkomende, soe schollen de eddelen vrowe Thede gravynne, juncker Enno unde syne brodere graven, Heren Maurizes vorb. des eyn hovetheren unde eyn benemer wesen voir schaeden. Hijrmede schall alle twidracht, schelinge unde unwille unde ghebreke woedanich, dat de jo ghewesen synnen unde woe dat de herkumpstich mochten hebben ghewoerden unde men de ghenoemen hedde konnen unde macht, alynghe unde ganslichen mede gesleten, gheslichtet unde gruntlichen daleghelecht unde ghelyket to ewighen tyden, alle arghelyst unde nyge valsche funde bueten ghescheiden. Schedesheren unde vruntschapsluede in dessen vorghescr. puncten synnen ghewest de erbern unde ersamen meister Hycke van Dornum etc. vorg., Haye to Papenborgh unde Ubbo to Pleghewert hovetling, alle desse artikele unde puncte malckanderen van beyden parten wol to holdene in gueden truwen; unde desses to merer ghetuechnisse unde vasticheit hebben wy Thede gravynne, junckher Enno voir uns, unse broeder unde ervent, unse zeghele unde wy schedesheren voirb. oek unse zeghele, unde wy Hero Maurizes unde meister Hicko vorgh. unse zeghele witlichen mede laten hanghen, unde ghehanghen an dessen breff. Ghescheen unde ghegeven nae Christi geboert vierteynhundert jaer, dairnae in deme eyn unde tachtigesten jare, ame saterstage voir deme hilghen soendage Invocavit erst in der vastenen.
