Die Visitatoren des Zisterzienserordens tadeln das Kloster Ihlow.
Nos fratres Bernardus abbas ad sanctam Mariam in Clarocampo ordinis Cysterciensis Traiectensis dyocesis, sacre theologie professor, visitator per Frisiam premissi ordinis, ut in literis desuper confectis apparet, constitutus, et Rodolphus abbas ad sanctum Bernardum in Adwerth, ordinarius visitator monasterii sancte Marie in Scola Dei, Monasteriensis dyocesis, notum facimus universis et singulis presencia visuris seu audituris, quod nunquam dedimus litteraliter vel verbaliter licentiam domino Theoderico de Rees, quondam abbati Scole Dei Bremensis dyocesis, auctoritate ordinis vendendi seu alienandi aliqua bona immobilia a monasterio predicto de Scola Dei, que auctoritas capituli generalis et omnis alienatio sive venditio immobilium sine auctoritate premissa secundum tenorem nostrorum privilegiorum de facto[*] est irrita et inanis. Preterea fratres dicti monasterii coram nobis deposuerunt suas manus ad pectus ponendo, ad hoc per nos requisiti, sicut et prius tempore dicti domini Theoderici tempore sue[*] absolucionis contra eundem deposuerunt, quod eidem nunquam consenserunt ad vendendum aliqua bona immobilia et presertim in venditione allodii in Monekewerven, in Astragroda in parochia Dornum[*] situati, inita cum nobilibus et honestis viris capitalibus, videlicet Mauricio in dicto Dornum et Haykone in Hint. Quare vocati[*] ad nos sicut prius quandoque eodem modo advocavimus fratres dicte Scole Dei, ut in verbo sacerdotii testimonium perhiberent veritati, et invenimus maiorem ac saniorem partem fratrum non consensisse sed potius contradixisse; ceterum nichilominus percepimus in verbo veritatis ab eisdem fratribus sigillum conventus dicte Scole Dei pro tunc surrepticie acquisitum et obtentum et omnia facta, scripta ac sigillata premissam materiam tangentia, ignorante capitulo, saltem maioris et sanioris partis, ut prefertur, dicti conventus secrete latenter et silenter peracta sunt et patrata. Acta sunt hec in monasterio prefato, anno Domini Mo quadringentesimo quadragesimo tercio, crastina visitationis Virginis gloriose, in presencia dompni Theoderici Peyns, officialis generalis curie Bremensis, et Alberti curati in Weineym, Bremensis diocesis, quod nos cum nostris dependentibus sigillis una cum sigillo dicti domini Alberti protestamur.
