Zeugnis des Lutet Reedlefsna in Toquard und des Menso Memmena in Hattersum vor dem Pfarrer Lubertus Werneri in Wittmund, daß olde Tanno, seine Brüder und seine Eltern niemals Herren über Wittmund und seine Kirche gewesen sind.
Vor my Lubertum Werneri, kerckher to Wytmunde, synt ghecomen Lutet Reedlefsna to Toquart[*] unde Menso Memmena to Hattersum, [*] myne kerspellude, waeraftiche mans, de alle yaer ens gaen to deme werden hyllygen sacramente, lyck also goden crystenenluden tobehoert, olt unde kranck eres lychames, doch sunt unde vulmechtych erer synnen, unde bekanden by erer selen salycheyt, dat yt ein nycht wytlyck en ys unde newerlde ghehort hebben van eren olders, dat olde Tanne unde syne broders, edder ere olders, weren gheboren ofte ghekoren heren to Wytmunde. Vortmer bekande Menso Memmenna erghenompt, dat he ys ghewest yn olden Tannen und syner broder denst lenck wen 36 yaer, unde dar se hadde 3 huse up deme kerckhove, 1 west van der kerken unde 1 by der sudersyt der kerken up deme kerckhove, unde 1 by der nordersyt[*] der kerken up deme kerckhove, zy yt noch mercklyc ys; unde de kerke was entwey deelt myt ener muren, de dar up ghynck by der zuderkerckdoer wente boven an, unde dat uterste deel yn der kecken heten se dat nye werck, daer hadden se ynne ene putte, ene molen unde wes se bederveden. Ute deme nyen werke ghynck ene dore yn den torn, dat noch openbaer ys. Des to ener merer tuchnisse der waerheyt heb yck Lubbertus Werneri kerckher vorscr. myn ynghesegel laten drucken nedder upt spacium desses sedels. Int yaer unses Heren, do men scref Mo CCCCo XCIo, ipso die Laurencii gloriosi martyris.
