Wij Borghermester ende Raedt ijn Groeninghen betueghen mijt desen openen breve dat voer uns sijnt ghekoemen Wolter
van Bijler Gheertruedt sijn echte huesfrouwe ende bekanden voer hem ende hoeren arffgenamen Woe die Erbare Goetsen
Schaffer ende Fije sijn echte huesfrouwe hem ghantze vullenkoemen vorwissinghe vuldaet ende overleveringhe
hebben ghedaen tho weten voer hoer andeel van alle szoedane guederen ende arffnissen hues hoff landt sandt
replick unreplick renten rentebreven goldt sulver gemuntet ongemuntet cleen ende groet ijn alles nichtes
uuthbesundert woe ende waer binen offte bueten Groeningen de ghelegen moeghen wesen als Gertruedt
voerscr. van hoer salighe grote vader grote moeder oeck vader ende moeder anghearfft ende angestorven sijnt
Dancken daer umme Goetsenj ende Fije voergescr. gueder vorwissinghe vuldaet ende overleveringhe daer
up Wolter ende Gheertruedt vorscr. voer hem ende hoeren arffgenamen schelden Goetsen ende Fije vorscr.
ende hoeren arffgenamen vrij ende quijdt ten ewighen dagen nummer bet meer ansprake tho doen hebben
noch beholden mijt ghenen rechten gheestelick noch wartlick umme szodane guederen ende arffnissen
als vorscr. ijs. Sunder arghelist. Dat oerkunde wij mijt unszer Stadt Secreet. Ghegeven inden
jaer unses heren dusent vijffhundert vijffendevijfftich den veerteijnden dach Junij.

x

x

Archief	Groninger Archieven
Fonds	H.A. Gruys
Toegangsnummer	521
Inventarisnr.	35
Jaar	1555
Datumcode	1406

x

x