Burgemeesters en raad te Groningen verklaren dat Johan de Korffmaker door abdis Hille, prior Reyner en het klooster te Essen in het klooster is opgenomen, in ruil voor een rente van 5 Arnhemse gulden uit zijn huis benevens al zijn bezittingen.

Wij Borghermeistere ende Raed in Groningen bekennen ende tughen mit desen openen breve dat voer ons is ghekomen Johan die korff-
maker ende bekande dat die eerbaren gheestliken vrouwe Hille abdisse, her Reyner prior ende ghemene convent tot Essen by Groningen omme be-
gheerte willen die hie tot oren convente voerscreven heefft ghehat ende heefft em ontfangen ende anghenomen hebben mit em ynt convent to wonen ende te
wesen in manieren als hijr nae ghescreven steet. Int eerste dat die vijff Arnhemsche gulden renthe de Johan voerscreven heefft uut den huse dat em
tohoerde bynnen Groningen ende wes van den voerscreven huse koemt ende voert all sijn guet, ghelt ende reetscap als hie nu ter tijt hefft ende hijr namaels
werven ende wynnen sal, bliven ende wesen sal to des convents voerscreven behoeff. Ende des sullen sie em weder besorghen wes em noet is ghelijck enen
van oren hoersamen broder ende sal hebben also lange als hie levet dat hues daer hie nu ynne is sijn werck daer ynne to doen ende to wesen. Mit
vorworden weert zake dattet den convente voerscreven offt em niet langer en ghenoghede mit malkanderen to bliven in manieren als voerscreven is
dat sal die ene den anderen ene maent to voren opseggen ende dan soe sal em dat convente voerscreven gheven ende betalen drie hondert Arnhemse
guldene offte payment dat daer guet voer is, een hondert gulden daer van to betalen tendes der voerscreven maent ende de anderen twe hon-
dert gulden te betalen bynnen twen jaren daer naest komende elkes jaers hondert gulden. Ende soe mach hie mit em nemen sijn bedde,
sijn cledere, kiste ende stole als hie daer in den voerscreven huse heefft ende alle die anderen guede voerscreven sullen bliven to des convents voerscreven behoeff
tot ewighen daghen. Dat orkunde wy mit onser stad seghele. Ghegeven inden jaer onss heren dusent vierhondert neghen ende dertich
des naesten wondesdaghes nae onser liever vrouwen daghe assumpcio doe Lubbert Lewe, Henrick Barolts, Otto Clant ende Henrick Kater
Borghermeistere weren onser stad.

x

x

Archief	Groninger Archieven
Fonds	Kloosterarch.
Toegangsnummer	172
Inventarisnr.	152
Regestnr.	189
Olim	Arch. Klooster Essen, inv.nr. 13, reg. 32. Reg. Feith 1439.17.
Jaar	1439
Datumcode	EpAssMar

x

x

x

Commentaar	Met het stadszegel van Groningen

x

Materiaal	perkament

x