Ludolf Heppinghe te Aelden in het kerspel Zweel verkoopt en draagt bij stoklegging over aan de ministerse en de gemene zusters van het Olde Convent te Groningen een jaarlijkse rente van zes mudden rogge uit Heppinghe goed in de marke van Aalden.

Ic Ludolf Heppinghe to Aelden inden kerspel van Zweel Bekennen ende betughen overmids dessen
openen brieve voer my ende mijn erfghenaem dat ic met gueden beraet vercoft hebbe ende over-
ghegheven der ministerschen ende ghemenen zusteren vanden olden convent in Groeninghen ses stede
mudde rogghen jaerlix to boeren uyt ende over al myne goede huus ende hoff acker ende lande maeden
waer ende schaer als dat gheleghen is inder marcke van Aelde gheheten Heppinghe guede om een
summe gheldes die my vol ende al betaelt is Ende desse ses stede mudde rogghen sal ic ende myn erfghenaem
den voerscr. susteren alle jaer leveren to Groninghen in hoer convent op die terminen als ghewoenlike
is inden lande van Drenthe pacht mudden to betalen Ende hier van hebbe ic den voerscr. susteren den stock
ghelecht als ghewoenlike ende lantrecht is des landes van Drenthe daer over ende aen waren Roloff
Heppinghe Willam Banning ende Aelbert Eysing ende voel ander goede lude die vanden wynkop mede
droncken sonder alle arghelist In orkunde der waerheit so hebbe ic mijn seghel aen dessen brief
ghehanghen Ende om meerre vestenisse ende sekerheit so hebbe ic ghebeden den eerbaren heren ende
priester her Willam Mynne onsen vicecureyt van Zweel dessen brief voer my mede to beseghelen Ende ic
her Willam voerscr. om bede willen Ludolfs voerscr. hebbe mijn seghel aen dessen brief ghehanghen to een
tuych der waerheit Ghegheven inden jaer ons ehren dusent vierhondert ende vijfendeveertich op
sunte Agnieten avont der heiligher joncfrouwe.

x

x

Archief	Groninger Archieven
Fonds	Kloosterarch.
Toegangsnummer	172
Inventarisnr.	403
Regestnr.	219
Olim	Reg. Feith 1445.15.
Jaar	1445
Datumcode	vAgneti

x

x

Commentaar	Met de zegels van Ludolf Heppinghe en van Willam Myne, vicepastoor te Zweel

x

Materiaal	perkament