Evert Sickinge, proost te Loppersum en redger te Baflo, verklaart dat hij met de wedmannen Hoyko Boyama en Abelo Hilkama heeft toegewezen aan Johan Wobbekens, burger van Groningen, en diens vrouw Grete, een half heem, een halve hofstede en een half huis met toebehoren [te Baflo].

Wy Evert Sickinge provest toe Loppersum reddie in der tyt toe Bafftlo
bekenne voer allen gueden luden In dessen openen brieve dat wy hebben myt onsen
wedmans als Hoyko Boyama ende Abelo Hijlkama toe gherecht ende toeghedomet
Johan Wobbekens een borgher toe Groeningen ende synen wive Grete van Rolef
Folcmers soen toe Bafftlo ende Ytet sijnen wive soeven iuck landes ende half forling
Item die vier iuck leggen in Bafftler hemrick in die Trinde venne ende Lange venne
daer Bafftler wech op die sijde is ende lecht ter zwette Item in die Noert meer een
half iuck ende een half forlinck daer Roeliffs kindere alsoe vele en teghen
hebben Item een iuck in die dichten daer Bafftler wech by der zuder zijd lecht Item
soeven forling daer Hoyko Boyama op die oester sijde ende Eskel toe Inaldingum
op die wester zyd liggende ter swette uppa Liddum Item dre forlinge op Hem ackeren
daer Mellama op die noert zijd sint liggende ter zwette Item een half iuck in die
Kompweren daer Fijwe op die wester zijd licht ter zwette voer soeven stighe
arnemsche gulden ende voer sestijn die wij Johan en Grete vorscr. schuldich weren
Ende want wy Rolef ende Ytet dyt vorbenomede ghelt niet betalen mochten
soe loven ende gheven wy voer ons ende onse erffgenamen voer Sibbe ende Swede ende
voer alle die ghene die op dit vorscr. lant myt rechte spreken moeghen Johan
ende Grete vorscr. ende oren erffgenamen dyt voerbenomede lant vry ende veerdich eweli-
ken ende erfliken toe bruken ende toe besitten ende al horen vrien willen daer
mede toe doen wes hem ghenoeget sonder alle argelist ende nie vonde die desen
brief toe hinder comen moeghen Orkunde deser waerheit soe hebbe ick Evert
provest ende reddie voerscr. myn zegel an desen brief ghehangen Ende om mere ves-
tenisse soe hebbe wy Roelijf ende Ytet vorscr. ghebeden Meyster Anthonius persona
toe Bafftlo onsen hovet priester desen brief mede over ons toe beseghelen Ende
ick Anthonius persona hebben mijn zeghel mede an desen brief ghehanghen om Ro-
lijf ende Ytets vorscr. bede wille Ghegeven int iaer ons heren Duusent vierhondert
soeven en viertich des maandaghes nae Sunte Johannes daghe ante portam latinam.

x

x

Archief	Groninger Archieven
Fonds	Kloosterarch.
Toegangsnummer	172
Inventarisnr.	20
Fol.nr.	fol. 005v
Regestnr.	238
Olim	Arch. Klooster Selwerd, inv.nr. 1, reg. 78.
Jaar	1447
Datumcode	LpJohaPL

x

x

Materiaal	perkament