Berent Koenerdes, ambtman van Selwert, oorkondt dat Sycko Boelens te Wolde en zijn vrouw Evert hebben verkocht en bij stoklegging overgedragen aan ministerse Gese van Aernhem en de gemene zusters van het Olde Convent in Groningen Alynghe-erve, gelegen te Wolde, strekkende van het diep tot het "moer", uitgezonderd het land dat Yemme Lambers en diens vrouw Ludtgert bezitten, het land geheten Hileweer en het land geheten Hylkelandt, waarvan Yemme de helft bezit, en Hylkehof.

Ic Berent Koenerdes amptman indertijt des gerijchtes van Selwert, betuge mit dessen openen breve dat voir my sint gekomen Sycko
Boelens to Wolde, Ende Evert syn echte huusvrouwe, ende bekanden voir em ende oren erffgenamen, dat sy hebben vercoft upgedragen
ende overgegeven, droegen up ende gaven over erfflycken ende ewelycken suster Gese van Aernhem, mynysterssche, ende den gemenen
susteren des olden convents in Gronyngen vander derden Regelen sancti Frnascisci, ende oren naekomelingen aldaer, tot behoeff des
selven conventes, dat Alynge Erve gelegen to Wolde, daer sy nu ter tijt up woenachtich sint, ende se duslange beseten ende
gebruket hebben, als huus hoff landt sandt, ende holt, soe breet ende soe langk, als dat gelegen is, ende se duslanghe
rustelick ende vredelic gebruket hebben, mit allen den tylber guederen, streckende vanden dyep mit dat moer. Behalven
dat landt dat Yemme Lambers ende Ludtgert syn echte huusvrouwe toebehoirt, daer die huusweer van is twaleff roeden
breet mit syn toebehoir naebuerlijck. Ende sovendehalff roede landes, dat Hileweer geheten is mit syn toebehoir daer
sunte Jacops guet by ter swette lycht up die suudersydt. Ende sovendehalff roede dat Hylke landt geheten is, dair
Yemme Lambers die helfte van toebehoirt, behalven Hylke hoff, daer een roede landes breet toebehoirt aen dat oester
eynde, ende anderhalff roede landes breet an dat westereynde. Beholden Jemme syn toesprake, ofte hij yenich recht meende
to hebben, over dat landt to varen, daer Yemme voirscr. die helfte van tobehoirt. Behalven die hofstede, dair up die
suudersyde gelegen is Syckens voirscr. huusweer. Ende up die noordersyt Hinrick Lyppens, myt scot ende sculde die daerup
steet, als kercken recht soe als dat gewoentlick is. Behalven die jaertijde, die daer up staen, die Sicko ende Evert
voirscr. op sick sullen nemen, vrij ende quijt die voirscr. landen ende guederen, erfflycken ende ewelycken to bruken ende to besitten
voir ene somme geldes, alse sesshondert golden overlandssche rynssche guldenen, die Sicko ende Evert voirscr. bekanden
dat em voll ende all is betaelt nae oren wille. Ende wat dat Erve voirscr. beter is dan die voirscr. somme geldes die
Sicko ende Evert voirgen. ontfangen hebben, dat geven Sycko ende Evert voirscr., den susteren voirgen. ende oren nae
komelyngen tot behoeff des selven conventes, voir een ewych testament, voir oir ende ore vrenden sielen to bydden Ende
hijr van heft Sicko ende Evert voirscr. der mynysterssche ende convente voirgen. den stock gelecht, alse landtrecht is
inden gerychte van Selwert voirden bueren tot Wolde hijrnae bescreven, alse voir Johan Scaffer, Roeloff Hannekes, Hyn-
ryck Sterkes, Evert Besuude, Utyke Besuude, Wylteke Roeloff Hannekes sone, Waelke Lyppens, Otto Camptoens ende
meer gueder luyden genoech sonder alle argelyst. Des tot enen oirkonde hebbe ick Berent amptman voirgenoemt
myn segell an dessen breeff gehangen. Gegeven inden jaer ons heren dusent vierhondert ende tnegentich up
sunte Vyctoirs Avent.

x

x

Archief	Groninger Archieven
Fonds	Kloosterarch.
Toegangsnummer	172
Inventarisnr.	354
Regestnr.	788
Olim	Arch. Olde Convent, inv.nr. 36, reg. 79. Reg. Feith 1490.19.
Jaar	1490
Datumcode	vGerVic

x

x

Commentaar	Met het zegel van Berent Koenerdes

x

Materiaal	perkament