Testament des Häuptlings Imelo von Hinte und Osterhusen.
In nomine Domini. Amen. Int jar unses Heren dusent veerhundert viiff unde viifftich, uppe sunte Paules dach commemoracionis, sette yk Ymelo, hovelinck toe Hinte unde Osterhusen etc., mynen lesten wyllen unde testament. Int ersten so wyl yk, dat de breff, den yk ghemaket hebbe tuschen my sulven unde Ayeld mynen soen van der ene syde, unde Haren unde Ayeld syn broder van der ander syde, de de holt van Osterhuser[*] unde Hlertere heert unde van golt unde sulvere etc., de schal belyven in vuller macht unde bestant, soe he inholt. Voert so geve ik den hillighen toe Hinte veer grase landen in Ubbenghefen. Item so gheve ik toe unser leven Vrouwen altaer toe Hinte twelf grase unde een half gras uppe Hersterwerum. Item so gheve ik den kerkheren toe Hinte teyn demet landes in Osterhuser[*] hammerik by Lopsummere wech. Item de veer bydden orden elk schal hebben enen Ryneschen Gulden. Item de juncvrouwen to Reyde enen Rynesgulden unde sen Arnesche gulden. Item de sustere toe Dichusen enen Rynesgulden. Item de brodere to Aland enen Rynesgulden. Item de brodere toe Langhere monnike enen Rynesgulden.[*] Item Meynke, myn husvrouwe, schal hebben een unde twyntich demede landes to orer liifftuecht, de veer demet synt van myner moder lant, men de seventeyn synt van Himbe lant, dar schal se my unde myne vrunde mede holden in bedenghe oer levent, darna so schal dat erve wedder up den hert. Ok so schal Meynk hebben twe rogke van Ypersche[*] laken edder van Amsterdammesch. Item dat yk unde Meynk hebben aver wynter unde aver sommer betat unde betelet, schal se half hebben. Ok so schal se oer guet uet hebben, soe se dat bracht hefft: viiff koo, een jene paer ossen vor dre unde twyntich Arensgulden, twe twynter rinder, dree bedde, twe bankpoele, veer hovetpole, twe par laken, een reye, unde dat ik sulven screven hebbe in myn bedeboek, do se kranc was. Item so hope yk, dat der kinder hert to Dallengwerum ys so guet, als ik den untfenc. Item soe hebbe yk Ette aringhe[*] vorkofft vor veer unde dertich Arnische gulden. Item soe hebbe yk Hybelen Kenesne vorkofft 7 grase landes in Fiskwerter hammerik, gheheten Heyseldeswart, dat gras vor teyn Ar. gulden, enen Ryneschen gulden baven den summe; dar ys an betalet twelf Rynesche gulden, den Ryneschen gulden to rekende vor twe Ar. gulden; dat erve schulde he my betalet hebben toe sunte Vites market, so en hefft he my edder mynen soen neen hure gheven, sedder der tiit, dat wy uet den lande wesen hebben.[*] Item so hebbe yk Meynke rynk utsat under frou Reynste vor dree Rynesgulden. Item so hebbe yk mynen eghen rynk utsat to Gronighen under Gertes husvrouwe van der betze vor veer Rynesgulden. Item so hefft Ocko toe Dallengwerum van den hillighen to der Munte kofft viiff grase landes; dat leste gelt hebbe yk uetghegheven, unde Thiark Lupkens ys borghe vor (myt) breff unde segel. Item soe hebbe yk Nonnen toe Osterhusum undersat de fenne an der vorborch toe Hinte vor enen summen geldes, soe de breff inholt, den ik em gheven hebbe. Item soe hebbe yk van der kinder weghen toe Dallengwerum vorkofft een par ossen Aelrik to Fermessum vor achteyn Arnische gulden, de en hefft he noch nicht betalet. Item de werve to Fiskwert, de Folpmer Allena Folt ghenamen hadde, de schelde yk Foltes erfnamen to guden so vele so my daran boert. Item dyt ys dat guet, dat her Wynne van my heft: ene schipkiste unde een tafele myt eneme trysoer. Item ene tynne kanne van neghen krose. Item en deken unde een bedde myt Hollantsche buere unde een groet becken unde een luttik scheerbecken, twe tynne plattere, dree moesschottele. Item so byn yk her Mener schuldich veer Postolatesgulden. Item her Enno veer Postulatsgulden, den gulden to reken to viiff unde twyntich krumsterte. Item so byn yk salighen her Liuppe to Suderhusum schuldich veer golden Rynesgulden.[*] Item so byn yk den hillighen to Hersewey[*] schuldich veer dusent deckstenes. Item grote Poppe to Folkerderwer ys my schuldich enen golden Rynesgulden. Item Mengo ys my schuldich 3 Arnesche gulden unde twe Postulatsgulden. Item Jebbe unde Lutat to Suderhusum hebben my in de broek vorkofft een pansar vor veer unde twyntich Arnesche gulden, unde see synt dar borghe voer. Hiir an unde aver hebben ghewesen unse kerkhere her Enno, her Mener vicarius, Acko Frouwena Wydsaldenna, Heysald Lutasna, Grote Riko, Dodo Scomaker, Johan Scroder, buermanne to Osterhusum, unde noch ander vrouwe unde manne ghenoech. So hebbe yk Ymelo ghebeden unsen kerkheren, her Ennen vorscreven, unde unsen vicarium, her Mener, vor my to beseghelen dussent testament; soe hebbe yk Enno vorscreven unde Menardus unse segele hanghen toe dessen breff unde testament. Int jar unses Heren dusent veerhundert etc, soe tovoren gescreven ys etc.
