| Nummer:msk525134 | Datum:12. Mai 1480 | Overlevering:Abschrift | Vindplaats:Manuskripte Kunst, inv.nr. 525, S. 134-135 |
Eggo Hobben übereignet dem Häuptling Aild von Grimersum ein halbes Gras Weidelandes unter der Form des Bierkaufes.
Wy her Gheroldus van Greedzil, kerckhere tho Wyrdum, unde Eed Ockena, Eltke Krogher unde Tatke Egghena, doen wytlick in kracht dusses breves vor alsweme, de dessen breef zeen, hoeren edder lezen, waer dat noet ys vor ghestelick edder werlick, wo dat yt uns wal vordacht ijs unde hebben yeghenwordich daerbij wezen, dat Ayld, hovetling tho Grimersum, quam tho Wyrdum int Eggho Hobben hues zaligher dechtnisse, unde bracht mede een tunne Hamborgher beers, dar de wyrdes mede aff drunken; zo ghaf Eggho vorscr. in unzer jeghenwordicheit deme vorscr. vorsichtigen Aylde een half gras meedlandes belegen in Nordermeer, unde desghelikes heft ghedaen Freeyd tho Hinte saligher ghedechtnisse, unde heft yt deme vramen proveste[*] thoghedruncken myt een ghlas beers van syner thokamender huesfrowen weghen, Eyten salighen Egghert nichte, na den male, dat yt Egghen ende Eyten vorscr. tho hoep thohorde, dat tho bruken, erven, weslen, versetten edder vorkopen na sinen wyllen vor al ansprake van beyden parten tho ewighen tyden, al arghelist uetghesecht, hulperede edder nye vunde. In een oerkunde dusser waerheit, zo heb ick Gheroldus vorscr. vor uns allen ghedrucket mynen inghezeghel upt spacium dusses breves. Int jaer uns Herrn Mo CCCCo LXXXo, altere die ascencionis Domini nostri Jhesu Christi.
